O director xeral de Maiores e Atención Sociosanitaria, Antón Acevedo, visitou hoxe a unidade móbil do programa de Coidados porta a porta
A Xunta leva coidados gratuítos en podoloxía, audioloxía e estimulación da memoria ás persoas maiores de Lalín
As consultas están dirixidas a persoas maiores de 55 anos, que deben pedir unha cita previa a través dos números de teléfono 622 748 283 ou 623 546 992 ou do enderezo electrónico coidadosportaaporta.politicasocial@xunta.gal
Na capital do Deza leva desde o venres e estará ata o día de mañá
Do martes ao xoves estará en Vila de Cruces e do mércores ao venres en Silleda
Lalín, 30 de xaneiro de 2023 O director xeral de Maiores e Atención Sociosanitaria, Antón Acevedo, resaltou hoxe a aposta da Xunta polos servizos de proximidade para que todos os galegos poidan acceder a eles vivan onde vivan. Díxoo durante unha visita á unidade móbil do programa de Coidados porta a porta, que desde o pasado venres e ata mañá, atenderá aos veciños de máis idade de Lalín nas inmediacións da Praza de Galicia, ao carón do Concello.
Antón Acevedo, que estivo acompañado do alcalde de Lalín, Xosé Crespo, e da tenente de alcalde, Paz Pérez, destacou o éxito que ten esta iniciativa, que permitiu que, ata o momento, arredor de 30.000 galegos de máis de 55 anos de idade recibiran atención gratuíta en podoloxia, audioloxía e estimulación da memoria, e sen necesidade de desprazarse lonxe do lugar onde residen. As persoas interesadas só teñen que pedir cita previa nos números de teléfono 622 748 283 ou 623 546 922, ou ben no correo electrónico coidadosportaaporta.politicasocial@xuntal.gal.
Esta é a segunda parada que o autobús de Coidados porta a porta fai en Lalín. Na primeira, que tivo lugar a finais de agosto de 2022, un total de 110 veciños recibiron coidados sociosanitarios. O programa regresará por terceira vez a esta localidade a finais do verán.
Así mesmo, a partir de mañá e ata o xoves, ambos incluídos, unha unidade móbil estará no concello de Vila de Cruces; e do mércores ao venres haberá outra en Silleda. A semana pasada a iniciativa pasou polas localidades dezás de Rodeiro, Dozón e Agolada.