A Xunta recibe 5 ofertas para a mellora do espazo fluvial do río Louro entre a estrada PO-548 e a liña do ferrocarril, en Valga, que suporá un investimento de case 355.000 €
A actuación conta cun prazo de execución de 3 meses e ten como obxectivo minimizar o risco de inundación nesta zona onde a presión sobre a canle se ve aumentada con edificacións e áreas de cultivo que deixan pouco espazo ao río
Acometerase un encanamento de aproximadamente 800 metros do río Louro, desde 50 metros augas arriba da estrutura baixo a PO-548 ata a obra de fábrica existente baixo a liña do ferrocarril, incluído un tramo de aproximadamente 50 metros augas abaixo
Esta intervención engádese ás previstas no río Valga para a mellora do espazo fluvial entre a liña do ferrocarril e a rúa Devesa e para a protección da súa marxe dereita
Todas estas intervencións forman parte do convenio asinado entre e o Concello e a Xunta, que financia, contrata e executa os traballos cun investimento de 1,25 M€
O Goberno galego mantén a colaboración entre as administracións e axentes implicados para estar máis preparados fronte ao risco de inundacións e acadar unha máis rápida recuperación fronte ás súas consecuencias
Santiago de Compostela, 27 de xaneiro de 2023 A Consellería de Infraestruturas e Mobilidade, a través de Augas de Galicia, recibiu 5 ofertas de empresas para executar a obra de mellora do espazo fluvial do río Louro entre a estrada PO-548 e a liña do ferrocarril, no concello de Valga.
Esta nova actuación da Xunta, que suporá un investimento de preto de 355.000 euros forma parte das obras necesarias para minimizar o risco de inundación nesta zona do municipio pontevedrés, onde a presión sobre a canle aumenta polas edificacións e as áreas de cultivo das inmediacións, que deixan pouco espazo ao río para desenvolverse.
A intervención obxecto deste contrato é a mellora da capacidade hidráulica da canle do río Louro e as obras consistente na realización dun encanamento de aproximadamente 800 metros do río, desde 50 metros augas arriba da estrutura baixo a estrada PO-548 ata a obra de fábrica existente baixo a liña do ferrocarril, incluído un tramo de aproximadamente 50 metros augas abaixo. Os traballos contan cun prazo de execución de 3 meses.
Máis en concreto, esta intervención da Xunta forma parte das actuacións proxectadas no municipio de Valga e está recollida no Plan de xestión específico realizado na área de risco potencial significativo de inundacións dos ríos Ulla e Sar.
Os traballos previstos para minimizar o risco de asolagamento nos ríos Louro e Valga ao seu paso por este municipio pontevedrés suporán un investimento autonómico total de 1,25 M€. As actuacións proxectadas nesta área de risco potencial inclúen esta intervención no espazo fluvial do río Louro, a mellora do espazo fluvial do río Valga entre a liña do ferrocarril e a rúa Devesa; e a de protección da marxe dereita do río Valga, que recibiu nos pasados días catro ofertas de empresas para executar as obras, que suporán case 220.000 euros de investimento.
Apoio e colaboración
Todas estas actuacións desenvólvense a través dun convenio de colaboración entre a Consellería de infraestruturas e Mobilidade e o Concello de Valga, no que se recolleron distintas actuacións necesarias para evitar as inundacións na zona urbana.
Segundo o citado convenio, a Xunta, a través de Augas de Galicia, asume integramente a financiación do conxunto das actuacións e levará a cabo a contratación da execución, dirección e xestión das obras.
Pola súa banda, o Concello de Valga comprométese á posta a disposición dos terreos necesarios para o inicio dos traballos e á realización das xestións pertinentes para posibilitar a súa execución. Tamén asume a obriga de recibir as obras que pola súa natureza sexan susceptibles de tal recepción e a asumir o seu mantemento e conservación, coa utilización das instalacións executadas de acordo coa finalidade prevista.
As actuacións están cofinanciadas con fondos Feder, no marco do programa operativo Feder Galicia 2014/2020.
