Santiago de Compostela, 27 de xaneiro de 2023 O Diario Oficial de Galicia (DOG) publica hoxe a orde pola que se convocan as axudas do Fondo de Compensación Ambiental (FCA), destinado a apoiar os concellos na mellora do medio natural. A Xunta destina máis de 11 millóns de euros a esta iniciativa, creado para distribuír o canon eólico en beneficio da conservación e restauración da contorna, así como do reequilibrio territorial.

A convocatoria distingue dúas liñas de axudas, unha en concorrencia non competitiva, dotada con 6 millóns de euros, e outra en concorrencia competitiva, á que se asignan 1,7 millóns de euros. A estas contías súmanse 3,5 millóns de euros destinados a actuacións específicas de protección do medio, entre as que figuran a prevención, extinción e xestión de situacións de sinistro ou de risco.

A primeira das liñas vai dirixida aos concellos nos que haxa parques eólicos e a segunda, a todos os concellos, mancomunidades ou consorcios locais de Galicia, sempre que estean participados por un ou varios concellos. Cada municipio pode presentar ata dúas solicitudes, sempre que unha sexa individual e outra conxunta. Cada unha delas debe corresponderse cun único proxecto, que, no caso das solicitudes individuais de concellos, pode abranguer varias accións.

As accións subvencionables inclúen os investimentos e custos de funcionamento dos servizos municipais dedicados á protección do medio. Entre os obxectivos que deben perseguir figuran a conservación da biodiversidade, o fomento do coñecemento e da utilización recreativa e didáctica dos recursos naturais, e a recuperación do medio natural degradado ou contaminado. Tamén deben impulsar a eficiencia e o uso sustentable das enerxías renovables, e, en xeral a protección do medio natural.

Neste marco, poden acollerse ás axudas as campañas divulgativas, plans e proxectos ambientais, as accións de eficiencia enerxética e de redución da contaminación lumínica, as melloras enerxéticas nas instalacións municipais, e a adquisición de vehículos con distintivo ambiental ou destinados a actuacións a prol da contorna natural. As infraestruturas destinadas á utilización recreativa e didáctica dos recursos naturais, as actuacións a prol da integración paisaxística nos núcleos rurais e os proxectos para evitar a degradación e facilitar o control ambiental no ámbito municipal son outras das iniciativas subvencionables ao abeiro desta convocatoria.

A maiores, as axudas cobren tamén os gastos do persoal vinculado á execución das accións subvencionables.

As solicitudes presentaranse obrigatoriamente a través do formulario dispoñible na sede electrónica da Xunta de Galicia https://sede.xunta.gal no prazo dun mes desde mañá.

Máis de 116 M€ desde 2010

Desde a súa creación, en 2010, o Fondo de Compensación Ambiental permitiu cofinanciar proxectos por un importe de 116.655.448 millóns de euros.

O pasado ano, no caso da liña do fondo en concorrencia competitiva foron beneficiarias 94 entidades locais. Máis da metade delas destinaron a axuda a evitar a degradación ambiental mediante a contratación de persoal e equipamento para a protección do medio ambiente, con 48. Outras 23 accións centráronse en melloras de eficiencia enerxética e instalación de enerxías renovables, e 11 na adquisición de vehículos con distintivo ambiental cero emisións ou eco.

Ademais, houbo sete proxectos para a utilización recreativa e didáctica dos recursos naturais ou intervencións nos núcleos para integrar a contorna natural, catro  que combinaron distintas tipoloxías, e unha para unha campaña divulgativa de concienciación ambiental.