Aranga (A Coruña), 26 de xaneiro de 2023 O delegado da Xunta na Coruña, Gonzalo Trenor, acompañado polo alcalde de Aranga, Alberto Platas, visitou o Concello para coñecer as melloras realizadas neste municipio ao abeiro da orde para a creación ou mellora de infraestruturas, dotacións, instalacións e equipamentos vinculados á prestación de servizos municipais. Concretamente supervisaron as obra de mellora da iluminación do campo de fútbol municipal.

No percorrido,Trenor anunciou que o pasado xoves 19 xaneiro publicouse no Diario Oficial de Galicia a convocatoria correspondente a 2023, que mantén o orzamento de 3,5M€ no marco do compromiso do Goberno galego coas administracións locais.

Segundo explicou, a través desta liña de axudas a Xunta colabora cos concellos nas obras relacionadas coas redes de luz pública, a pavimentación de camiños e os parques infantís, así como as executadas nos edificios ou dependencias municipais. Neste último caso, inclúese tamén como gastos subvencionables a adquisición de equipamento, como mobiliario e material informático ou audiovisual. O financiamento pode chegar a cubrir ata o 80% do presuposto do proxecto.

A medida vai dirixida aos concellos que teñan menos de 30.000 habitantes de acordo coas cifras oficiais do padrón municipal e poderán optar a ela de xeito individual ou mediante asociacións ou agrupacións. Cada concello pode presentar ata dúas solicitudes, sempre que unha sexa de xeito individual e outra conxunta e para actuacións diferentes. Deberán corresponderse cun único proxecto, que pode abranguer varias actuacións, no caso de solicitudes individuais de concellos. A partir da publicación da orde, os potenciais beneficiarios disporán dun mes, ata o 20 de febreiro, para enviar as solicitudes.

Melloras na comarca da Coruña

Trenor sinalou que no concello de Aranga a Xunta destinou máis de 33.000 euros para a mellora renovar a iluminación do campo de fútbol de Aranga, ao abeiro desta liña de axudas e a obra cun orzamento de máis de 48.000 euros.

O representante do Goberno galego lembrou que na comarca da Coruña no 2022 realizáronse actuacións con estes apoios da orde de Infraestruturas nos concellos de Oza-Cesuras, Curtis, Miño, Aranga, Sobrado e Irixoa  por un importe de máis de 193.000 euros cuxos orzamentos ascenden a máis de 344.000 euros.

O delegado da Xunta explicou que esta orde para a mellora de infraestruturas municipais é unha das liñas que pon de manifesto o compromiso da Xunta coas administracións locais, como entidades máis próximas á cidadanía. Trátase así de “garantir o equilibrio no territorio entre o medio rural e urbano, o interior e a costa, a prol do desenvolvemento económico de toda a xeografía e que a veciñanza teña unhas óptimas condicións de vida con independencia do seu lugar de residencia”, engadiu.