Santiago de Compostela, 20 de xaneiro de 2023 O Diario Oficial de Galicia (DOG) publica hoxe a orde da Consellería de Cultura, Educación, FP e Universidades pola que se ditan as normas para a aplicación do réxime de concertos educativos cos centros docentes privados para o curso académico 2023/2024 e seguintes.

Deste xeito, segundo os prazos previstos, a Xunta de Galicia inicia o proceso para a subscrición dos concertos dos próximos seis anos académicos, os comprendidos entre o curso 2023/2024 e o 2028/2029, ambos inclusive. A renovación lévase a cabo logo de que os actuais concertos, en vigor desde o ano 2017, rematen ao final deste curso.

Como é habitual, os concertos abranguen as etapas de Educación Infantil, Educación Primaria, Educación Secundaria Obrigatoria, Educación Especial e FP.

A partir da publicación desta orde, iníciase o prazo da convocatoria dun mes no que os centros de ensino deberán solicitar os concertos para o vindeiro curso e os seguintes; prazo que rematará o día 20 de febreiro. Os centros interesados na subscrición deberán axustarse ao establecido a este respecto na Lei Orgánica 3/2020 de Educación, a coñecida como Lomloe, así como no resto de normativas de aplicación.

Nos cursos posteriores, a solicitudes poderán presentarse no mes de xaneiro anterior ao curso académico para o cal se solicita. Como é xa habitual, os concertos aprobados revisaranse cada ano para axustalos á realidade dos centros e das necesidades educativas da súa zona de influencia.

A orde que publica hoxe o DOG modifica e mellora a súa estrutura respecto á anterior, de 2017. Así mesmo, adáptase aos modelos e textos normalizados e ao funcionamento e evolución da administración electrónica para facilitar a tramitación dos expedientes.