A Xunta concede dous millóns de euros a Aceesca para a construción dunha nova residencia de atención á discapacidade no Porriño
Esta asociación de apoio ás persoas con diversidade intelectual é unha das dez entidades de Galicia beneficiarias da nova orde de axudas para a construción ou remodelación de centros de titularidade social, dotada de 13 millóns de euros
O Executivo autonómico tamén destina 800.000 euros anuais a financiar máis de 70 prazas nos centros de día e ocupacional de Aceesca
A Xunta outorgoulle dous millóns de euros a Aceesca, asociación centrada no apoio a persoas con diversidade intelectual, para a creación dunha residencia de atención á discapacidade no Porriño. A conselleira de Política Social e Xuventude, Fabiola García, acompañada da delegada territorial da Administración autonómica en Vigo, Marta Fernández-Tapias, visitou hoxe as instalacións desta asociación.
Fabiola García destacou o traballo que realiza esta entidade do Porriño nos seus centros de día e ocupacional, nos que a Xunta financia no seu conxunto 73 prazas ás que destina 800.000 euros ao ano —36 prazas no centro de día e 37 no centro ocupacional—. Ademais, recoñeceu o compromiso do Concello do Porriño na atención ás persoas con discapacidade e aos maiores, e sinalou que o Goberno galego seguirá a traballar da man da Administración local para ampliar aínda máis o financiamento do Servizo de Axuda no Fogar (SAF) ou para levar ao municipio atención gratuíta en audioloxía, podoloxía e estimulación da memoria a través do programa de Coidados porta a porta.
Vehículos adaptados e subida salarial
A conselleira tamén referiuse a outras medidas dirixidas a apoiar ás entidades que actúan no ámbito da discapacidade, como a nova orde de axudas para a adquisición de vehículos adaptados, dotada de 3,6 millóns de euros e das que se beneficiarán 80 entidades, entre elas Aceesca. Así mesmo, salientou o apoio prestado por parte do Executivo autonómico ás entidades para a actualización salarial dos seus profesionais, cunha axuda específica de máis de tres millóns de euros.