A conselleira de Política Social e Xuventude, Fabiola García, destacou hoxe que a Xunta de Galicia financiou a creación das aulas do maior de Aguiño, ás que acoden preto de 70 persoas, a través dun convenio de colaboración co Concello de Ribeira dotado con 60.500 euros.

Fabiola García explicou que con esta achega os maiores realizan obradoiros de memoria, novas tecnoloxías, alfabetización e exercicio físico, como o taekwondo cun grande éxito entre os participantes. Un conxunto de actividades que permiten favorecer un envellecemento activo e unha aprendizaxe continuada.

Así mesmo, salientou que as aulas levan en funcionamento tres meses e que, neste tempo, demostraron ser un servizo necesario, que repercute nunha mellor calidade de vida das persoas maiores. Neste sentido, recoñeceu que o Concello de Ribeira “é un exemplo a seguir porque pon actividades á disposición das persoas maiores en cada parroquia”, subliñou.

Máis horas de Servizo de Axuda no Fogar

A conselleira de Política Social e Xuventude anunciou que a Xunta de Galicia incrementará as horas do Servizo de Axuda no Fogar á disposición do Concello coa finalidade de continuar ampliando a atención a domicilio dos veciños de máis idade.

Ademais, informou que están a piques de rematar as obras de demolición da antiga discoteca Hesta Kurba, onde se emprazará a nova residencia pública autonómica de maiores do Barbanza, o primeiro centro no que se aplicarán as innovacións do novo modelo residencial. Así, nas vindeiras semanas procederase á publicación da licitación da redacción do proxecto básico de execución para a construción desta residencia que conta con 10 millóns de euros de orzamento e 100 prazas que se distribuirán en módulos de convivencia de 25 residentes.

Máis programas de envellecemento activo

Nesta liña, a conselleira de Política Social e Xuventude explicou que o Goberno galego ten como obxectivo poñer á disposición das persoas de máis idade programas de benestar adaptados á súas preferencias e que favorezan a súa autonomía.

Así, puxo de exemplo outras iniciativas levadas a cabo desde a Administración autonómica como os convenios realizados coas tres universidades galegas, que permitiron a máis de 2000 maiores de 65 anos realizar cursos universitarios o ano pasado; o programa de Benestar en Balnearios, que permitiu financiar estadías en establecementos da nosa Comunidade a máis de 600 persoas maiores; ou as Aulas Cemit, que levan formación dixital a máis de 100.000 galegos de máis idade.