Santiago de Compostela, 7 de xaneiro de 2023

A Unidade de Diagnóstico por Imaxe do Sergas e xestionada por Galaria, presentou recentemente dous dos seus traballos sobre resonancia magnética no Congreso da Sociedade Norteamericana de Radioloxía (RSNA). Considerado o evento mundial de referencia na especialidade de radiodiagnóstico, este congreso, celebrado en Chicago, reúne anualmente a máis de 45.000 profesionais deste ámbito.  

Os dous traballos presentados pola Unidade do Sergas tratan en profundidade as vantaxes que ofrece a Resonancia Magnética fronte a outros métodos de diagnóstico. No titulado “As múltiples caras das lesións en rampa do menisco medial”, abórdase como recoñecer estas lesións e a importancia dun diagnóstico correcto coa Resonancia Magnética para poder realizar o tratamento terapéutico, que habitualmente pasan desapercibidas na artroscopia convencional.  

O segundo traballo “Lesións prostáticas e periprostáticas hipertensas en T2 e as súas características na Resonancia Magnética”, recolle o resultado das lecturas e visualizacións dos máis de 600 estudos de RM multiparamétrica de próstata que se realizan cada ano na Unidade de DI, sendo esta a técnica máis avanzada para detectar o cancro de próstata de forma inocua.

Un servizo pioneiro

Dende o ano 2006, o Sergas conta cun servizo de telerradioloxía grazas á Unidade Móbil de Diagnóstico por Imaxe, un modelo de atención sanitaria único no sistema público español. A presenza destas unidades móbiles nos centros comarcais achega a tecnoloxía aos pacientes galegos, realizando ata o momento 200.000 probas.

Este mesmo ano, o Sergas renovou os equipos das unidades móbiles, incorporando avances que permiten obter imaxes de maior calidade cun tempo menor e pasando dun habitáculo de 60 a 70 centímetros de diámetro, mellorando así o confort dos pacientes. Esta renovación, equivalente á que se está a realizar en centros de referencia de maior tamaño, ofrécelle unha tecnoloxía pioneira aos pacientes dos hospitais comarcais.