A Xunta concede axudas a 9 asociacións profesionais e empresariais para a formación no eido do transporte por estrada cun investimento de preto de 450.000 €

O Diario Oficial de Galicia publica hoxe a resolución destas subvencións cuxo obxectivo é mellorar as capacidades dos profesionais do sector en materia de seguridade viaria ou de manipulación de mercadorías perigosas

As entidades beneficiarias son asociacións ou federacións de transportistas integradas no Comité Galego de Transportes

A Xunta, con estes incentivos, posibilitou a realización de 453 cursos nos anos 2020, 2021 e 2022, participando un total de 6.372 profesionais

Santiago de Compostela, 2 de xaneiro de 2023

A Consellería de Infraestruturas e Mobilidade publica hoxe no Diario Oficial de Galicia a resolución coa listaxe das 9 asociacións profesionais e empresariais ás que se concederon axudas para a formación no ámbito do transporte por estrada.

No seguinte enlace ao Diario Oficial de Galicia (DOG) poden consultarse as subvencións concedidas a cada unha desta entidades, que acadan un investimento da Xunta de preto de 450.000 euros: http://xurl.es/md3o7

O obxectivo destas axudas é colaborar coas entidades que se integran no Comité Galego de Transportes co fin de que realicen un plan formativo sobre materias de maior interese para os profesionais do sector.

Estas subvencións contribúen a que as entidades beneficiarias poidan mellorar as capacidades dos seus asociados en materias como a seguridade viaria, a manipulación de mercadorías perigosas ou a eficiencia na xestión empresarial.

Ademais inclúese a subvención de cursos para obter o Certificado de Aptitude Profesional (CAP), requisito imprescindible para os condutores que queiran operar no mercado profesional desde a entrada en vigor do Real Decreto 1032/2007, do 20 de xullo.

Tamén se promociona a realización, por parte das asociacións do sector, de iniciativas de carácter formativo noutros ámbitos de interese para os profesionais do transporte, como a mellora no coñecemento de diferentes idiomas, tanto para os profesionais do taxi como para todas aquelas persoas que realizan transportes internacionais.

O desenvolvemento destas actividades por parte das asociacións profesionais do sector do transporte facilita a plena adaptación das accións formativas á evolución das necesidades dos profesionais, dando continuidade a unha liña de actuación que a Xunta vén desenvolvendo nestes últimos anos.

Nas tres últimas convocatorias, as dos anos 2020, 2021 e 2022, a Xunta concedeu axudas que permitiron a realización de 453 cursos nos que participaron un total de 6.372 profesionais.

Imaxes relacionadas

Formación Transporte

Departamento:

C. de Vivenda e Planificación de Infraestruturas

Data de actualización: 02/01/2023

Novas relacionadas

A Xunta adxudica por máis de 5,7 millóns de euros a execución das obras da senda que unirá Pontevedra con Marín

A Xunta concede axudas a seis empresas da provincia de Ourense para a transformación de frotas de transporte de viaxeiros e mercadorías no segundo trimestre deste ano

A Xunta aborda coas federacións de transportes de viaxeiros as demandas do sector no desenvolvemento do Plan de Transporte Público de Galicia