Santiago de Compostela, 4 de xullo de 2024

A conselleira de Economía e Industria, María Jesús Lorenzana, recalcou hoxe a necesidade de que se revisen as convocatorias do Perte VEC para garantir que se dá prioridade aos provedores locais e que se mantén a contratación no territorio.

A responsable da política industrial do Goberno galego referíase así, en declaracións aos medios, á terceira convocatoria do Perte VEC, publicada hoxe, da que censurou que non inclúe novas bases e se remite ás anteriores. “Temos que revisar as convocatorias que se están facendo. O Estado ten que ver realmente que con estas convocatorias non se están garantindo as compras no territorio, en local, as compras ás empresas galegas neste caso”, esgrimiu.

Lorenzana volveu insistir no diálogo e en que o Ministerio de Industria e Turismo aborde estas cuestións co propio sector, coas comunidades que contan con industria da automoción en España e se garanta o mantemento non só das empresas tractoras, senón das pequenas, medianas e grandes empresas que tamén se teñen que ver beneficiadas dos fondos europeos. 

Neste contexto, apuntou que esta mesma semana a Xunta de Galicia convocou o programa de axudas por valor de 18M€ para impulsar a competitividade da industria auxiliar do sector en Galicia e garantir que se manteñen as contratacións en Galicia.

“Seguiremos por este camiño, pero é moi complicado cando o Estado non  atende as demandas nin do sector, nin das comunidades autónomas” onde esta industria ten implantación, concluíu.