O conselleiro de Cultura, Lingua e Xuventude, José López Campos presenta o libro ‘Tres xograres da ría de Vigo’

López Campos agradece a “contribución” de Takekazu Asaka coa proxección internacional de Galicia

O titular de Cultura da Xunta salienta o compromiso de máis de tres décadas do recentemente nomeado académico de honra da Real Academia Galega

A súa obra traducida ao xaponés supón un nexo de unión entre a cultura e a lingua de ambos países

Santiago de Compostela, 17 de xuño de 2024

O conselleiro de Cultura, Lingua e Xuventude, José López Campos, participou hoxe na presentación de Tres xograres da ría de Vigo traducida por Takekazu Asaka, recentemente nomeado académico de honra da Real Academia Galega. Trátase dunha obra que, tal e como explicou, pon en valor a ampla traxectoria do ensaísta, investigador e profesor, así como o seu compromiso e contribución coa proxección internacional da lingua e cultura galegas.

Neste senso, o responsable autonómico de Cultura salientou a prolífica obra do autor nipón así como a súa longa experiencia de máis de tres décadas sendo embaixador da cultura galega en Asia. “O traballo do mestre Takekazu Asaka axuda a construír e fortalecer a ponte que hoxe comunica as dúas culturas con idiomas tan afastados tanto desde o punto de vista lingüístico coma xeográfico”, sinalou López Campos.

O texto presentado hoxe completa unha aproximación á poesía medieval galega feita por Takekazu, no que se trasladan as cantigas de tres voces máis senlleiras da nosa lírica trobadoresca á lingua nipoa: Martín Codax, Meendiño e Johan de Cangas, ámbolos tres vinculados xeograficamente á ría viguesa. A obra conta cun prólogo, escrito pola profesora Mercedes Brea, especialista na nosa lírica trobadoresca, e incorpora tamén un CD no que o Trío Amaluz musican e interpretan en xaponés as cantigas dos tres xograres.

Embaixador da cultura galega no Xapón, Takekazu Asaka é Doutor en Filoloxía Románica pola Universidade de Kansa Gaidai (Osaka) e impartiu clases de lingua, gramática e literatura galegas en varias universidades xaponesas e mais no Instituto Cervantes de Tokyo. Actualmente, é membro correspondente da Real Academia Galega e embaixador da cultura galega no Xapón. As súas contribucións á proxección exterior da cultura galega foron recoñecidas, entre outras distincións, co XVI Premio Ramón Cabanillas.

Imaxes relacionadas

Data de actualización: 17/06/2024