Lugo, 6 de xuño de 2024

O delegado territorial da Xunta en Lugo, Javier Arias, explicou hoxe que as políticas de emprego da Xunta priorizan o apoio aos proxectos de mulleres emprendedoras no rural, establecendo criterios de discriminación positiva nos distintos programas de axudas que se convocan.

Arias participou na inauguración da Feira de Primavera de Emprendedoras  Innovando no Rural, impulsada polo Campus Terra da Universidade de Santiago de Compostela para promocionar o labor de empresas lideradas por mulleres no ámbito do rural galego.

Ao longo da xornada, varias destas empresas contarán con expositores na Mosqueira para dar a coñecer a súa oferta no sector da alimentación, da cosmética ou das experiencias turísticas, entre outros. Ademais, haberá mesas redondas sobre iniciativas  de dinamización económica que se desenvolven na provincia.

O delegado territorial sinalou que a Xunta “é moi consciente da importancia de fomentar o desenvolvemento rural a través da pegada das emprendedoras e por iso traballa dun xeito transversal a través de distintos departamentos para apoialas”. Así, contan con condicións vantaxosas en convocatorias como as de fomento do emprego autónomo ou de cooperativas e outros modelos de economía social.

En concreto, fixo referencia ao programa Emega, consolidado como unha medida fundamental para o emprendemento feminino e cualificado como boa práctica pola Unión Europea, que no último ano impulsou en Lugo ata 45 iniciativas de mulleres empresarias por un importe global de 560.000 euros. No presente exercicio a cifra pode verse incrementada, xa que a Xunta reserva 4 millóns de euros e prevense outorgar máis de 360 axudas na Comunidade.

Polos de Emprendemento

O delegado territorial subliñou “a aposta por achegar servizos de asesoramento a todo o territorio a través dos Polos de Emprendemento”, que na nosa provincia están situados en Monforte de Lemos, Friol, A Fonsagrada e Mondoñedo. “Son un referente próximo para todo aquel que teña unha idea de negocio, onde se lles facilitará acompañamento nas xestións económicas e administrativas e na materialización do proxecto”, apuntou.

Ao respecto, Arias lembrou que nos primeiros meses de funcionamento do Polo de Emprendemento de Mondoñedo, as mulleres supuxeron máis da metade dos usuarios atendidos, con propostas en ámbitos como a hostalaría, o comercio, a agricultura, gandaría, silvicultura e pesca.