Sanxenxo (Pontevedra), 1 de xuño de 2024

O secretario xeral para o Deporte, José Ramón Lete Lasa, participou no serán de hoxe na Gala da Federación Galega de Judo e D.A. na que destacou a Galicia como “sede do mellor judo do mundo” como demostran os catro judokas con licenza galega que competirán nos Xogos Olímpicos de París: Niko Shera, Fran Garrigós, Laura Martínez e David García. 

Neste sentido, Lete Lasa destacou a pioneiros como Victorino González e Roberto Naveira, os primeiros judokas galegos que chegaron aos Xogos Olímpicos de Seúl 88 e de Atlanta 96, respectivamente e, do mesmo xeito, lembrou a outros olímpicos galegos como María Bernabéu ou Alberto Gaitero.

O mandatario galego destacou a importancia de que unha porcentaxe moi alta dos 9.215 judokas federados cos que conta Galicia, preto do 77%, contan entre 6 e 16 anos polo que sinalou ao judo como un dos deportes con “mellor taxa de reposición de Galicia”. Precisamente lembrou a figura de mozos como Laura Vázquez, campioa de Europa sub23 que, de seguro, pronto chegará tamén a un tatami olímpico.

Lete Lasa agradeceu o premio que recibe a Consellería de Presidencia, Xustiza e Deportes como a mellor institución pública de 2023 e asegura que desde a Xunta de Galicia seguirase apoiando o judo galego de xeito decidido “polos valores e principios que transmite aos máis pequenos”.