O Servizo Galego de Saúde licita o contrato de limpeza do Hospital Materno Infantil Teresa Herrera da Coruña por preto de 6 M€
A licitación supón un incremento dun 23,6%, que permite cumprir os compromisos de melloras laborais adquiridos
Aplicaranse os incrementos de retribucións pactados e aumentará o cadro de persoal para facer efectiva a redución de xornada acordada
Santiago de Compostela, 31 maio de 2024
A Xunta, a través do Servizo Galego de Saúde, publica no Portal de Contratos de Galicia a licitación do servizo de limpeza do Hospital Materno Infantil Teresa Herrera da Coruña por un orzamento base de 5.923.992 euros durante dous anos, co que se materializarán diversas melloras para o persoal encargado do servizo.
O orzamento do contrato é un 23,6% superior á licitación anterior. Establécese, ademais, a posibilidade de prórroga por un período de ata 12 meses.
No contrato prevense, entre outras medidas, os incrementos retributivos comprometidos pola Consellería de Sanidade para a categoría correspondente ao persoal de limpeza.
Tamén se recolle o aumento do número de empregados necesarios para facer efectiva a redución de xornada comprometida pola Consellería de Sanidade o pasado ano.
Con esta contratación o Servizo Galego de Saúde pretende garantir os niveis de calidade, especialización, supervisión, coordinación e xestión do proceso de limpeza, acordes coa importancia do propio proceso asistencial que se leva a cabo no centro hospitalario da área sanitaria da Coruña e Cee.
