Santiago de Compostela, 25 de abril de 2024

Antonio Rodríguez Miranda tomou posesión hoxe como secretario xeral de Emigración, dentro do organigrama da Consellería de Emprego, Comercio e Emigración. Rodríguez Miranda confírmase así no cargo que leva ocupando desde decembro de 2012.

Natural do concello ourensán da Bola, é licenciado en Ciencias Biolóxicas, na especialidade de Zooloxía, pola Universidade de Santiago de Compostela, e técnico superior en Prevención de Riscos Laborais na especialidade de Seguridade e Hixiene Industrial, ademais de profesor e director de Formación.

A súa traxectoria política comezou en 1999, cando resultou elixido concelleiro en Allariz, concello do que foi voceiro municipal do PP desde o 2001 ata o 2012 e presidente local. Deputado no Parlamento de Galicia nas VII, VIII, IX, X, XI e XII lexislaturas, exerceu como voceiro do PP de Galicia entre os anos 2009 e 2013 e como secretario xeral da Emigración dende o 26 decembro de 2012 ata a actualidade.

É membro do Comité Executivo do PPdeG desde o ano 2006 e, na actualidade, é membro do Comité Executivo do PP a nivel nacional, como secretario do PP Exterior.