Santiago de Compostela, 18 de abril de 2024

A Xunta vén de adxudicar por preto de 330.000 euros as obras da senda na estrada AC-424 no Couto, no concello de Ponteceso.

A intervención, adxudicada á empresa Construcciones Cernadas S.L., comezará a executarse na segunda quincena de maio e terá un prazo de 3 meses.

O itinerario desenvolverase por ambos os lados da estrada que vai de Ponteceso a Corme e permitirá dotar un traxecto peonil seguro e continuo ata a zona do Couto.

A nova senda terá máis de 600 metros de lonxitude: concretamente, pola marxe dereita executaranse arredor de 400 metros, desde o quilómetro 1+100 ata o 1+506. Neste caso, tras a información pública, decidiuse ampliar o itinerario ata o acceso á última vivenda situada na glorieta de Balarés. Pola marxe esquerda, a senda acadará os preto de 240 metros, desde o quilómetro 1+140 ao 1+378, dando continuidade ao itinerario actual.

A senda irá paralela ao eixe da estrada, cun ancho variable de arredor de 1,50 metros, agás en zonas puntuais na parte máis urbana onde, debido ás edificacións, o ancho se reducirá aos 1,2 metros.

Na intervención será preciso estreitar un pouco a estrada na travesía do Couto, reducíndoa de 7 a 6 metros, dado o escaso espazo dispoñible para a construción da senda, ao tratarse dunha zona moi edificada.  

Ademais realizaranse outras actuacións complementarias: de drenaxe, executando un colector baixo a senda peonil para recoller a auga da estrada, das beiravías e da propia senda; e tamén a construción de 4 muros de perpiaño de 1 metro de alto como máximo alí onde son precisos.  

A actuación completarase coa disposición da mellora do firme na zona de aparcadoiro e coa renovación da capa de rodaxe da estrada.

Tamén, e coa vista posta en reforzar a seguridade dos peóns, que son os usuarios máis vulnerables da estrada, ao finalizar os traballos, a velocidade de circulación nesa travesía limitarase aos 40 km/hora, reforzando ademais a sinalización no treito.