Vigo, 18 de marzo de 2024

A delegada territorial da Xunta en Vigo, Ana Ortiz, anunciou este luns o apoio do Goberno galego ao evento internacional de disciplinas de baile Vigo Porté  que se celebrará a vindeira primavera. “É un pracer para a Xunta poder colaborar un ano máis cun evento da dimensión de Vigo Porté, non só pola capacidade que ten para mostrar o labor das nosas escolas de danza e a calidade dos bailaríns, senón tamén pola dimensión internacional que se gañou con esforzo e traballo”, sinalou.

Nun acto na sede da Delegación Territorial viguesa, a representante autonómica e a directora de Vigo Porté, Lorena López, celebraron o apoio institucional para a que será cuarta edición do Trofeo de Baile Internacional Vigo Xacobeo.

A través deste trofeo a Xunta de Galicia continúa prestando soporte a esta iniciativa que se consolidou como un dos eventos de danza de referencia en España e a nivel europeo e que regresará ao Auditorio Mar de Vigo entre o 26 e o 29 de abril.

Ata a data e desde a apertura de inscricións no mes de novembro, Vigo Porté 2024 xa rexistrou máis de 1.000 participantes de 38 escolas de danza nacionais e internacionais que representarán preto de 340 coreografías. O prazo de inscrición finaliza o 25 de marzo.

“Estamos entusiasmados coa celebración desta nova edición, e coa mesma ilusión e ganas que nas primeiras edicións. Vigo Porté é o escenario idóneo para a proxección das escolas de danza e os novos bailaríns, e así o pon de manifesto as cifras de inscricións que rexistramos edición tras edición”, apunta Lorena López, directora de Vigo Porté.

A directora do evento móstrase moi agradecida á Xunta polo apoio incondicional. “Queremos agradecer unha vez máis á Xunta de Galicia, a súa aposta polo evento, pola danza e por Vigo. Grazas á súa colaboración, Vigo Portei pode continuar realizándose un ano máis na nosa cidade”, indicou.