A Xunta apoia con máis de 500.000 euros a autónomos e pemes do Salnés
O delegado territorial visitou Move Cartón, en Cambados, que recibirá unha achega de 80.000 euros para a compra de maquinaria e a contratación dun traballador
Estas axudas deixan na provincia de Pontevedra preto de 2.5 millóns de euros chegan a unha centena de empresas
Reguera destacou o compromiso da Xunta co sector empresarial e a necesidade de seguir colaborando para mellorar a produtividade e competitividade das empresas galegas
Cambados (Pontevedra), 14 de marzo de 2024
O delegado territorial da Xunta en Pontevedra, Agustín Reguera, visitou esta mañá empresa Move Catón de Cambados, que foi unha das beneficiadas das axudas da Xunta dirixidas ao emprendemento (programa Emprende Plus).
Esta empresa, que se dedica ao sector do cartón, recibirá unha achega de preto de 80.000 euros para a compra de maquinaria e para a contratación dun traballador.
Cabe destacar que estas axudas benefician a cen empresas na provincia de Pontevedra e deixan unha achega de preto de 2.5 millóns de euros, dos cales máis de 520.000 euros son para ao redor de 20 empresas afincadas na comarca do Salnés. Desta forma a Xunta busca apoiar o investimento e a creación de emprego co obxectivo de fortalecer e consolidar iniciativas de emprendemento de persoas autónomas e pemes.
O delegado territorial lembrou que a colaboración entre o sector empresarial e as administracións “debe ser total e a todos os niveis, adecuado as iniciativas da Xunta aos tamaños e necesidades de cada empresa”.
No caso de Move Cartón, a achega do programa financia o 45 % do valor dunha nova maquinaria que permitirá un maior crecemento e rentabilidade desta empresa de recente creación.
Reguera rematou a visita destacando o compromiso da Xunta cos pequenos empresarios “que son a base da nosa economía” e a necesidade de seguir traballando para “fomentar a empregabilidade dos galegos e galegas, á vez que se potencia a produtividade e competitividade das empresas”.
Imaxes relacionadas
