Rivo destaca a colaboración da Xunta cos municipios para avanzar nunha sociedade máis igualitaria
A conselleira de Promoción do Emprego e Igualdade en funcións, Elena Rivo, participou na ‘Cea da muller’ organizada polo Concello de Mos no marco dos actos do 8 de marzo
Mos (Pontevedra), 9 de marzo de 2024
A conselleira en funcións de Promoción do Emprego e Igualdade, Elena Rivo, participou esta noite na cea organizada polo Concello de Mos, co gallo da conmemoración do 8 de marzo, Día da Muller.
O evento, que congregou autoridades locais e a representantes da veciñanza de Mos, permitiu á representante autonómica poñer en valor a importancia da colaboración cos municipios para acadar unha sociedade tolerante e igualitaria.
A Xunta segue a referendar o seu compromiso coas entidades locais para a promoción da igualdade, a conciliación e o mantemento dos Centros de Información á Muller (CIM), esenciais na detección e atención de vítimas da violencia de xénero.
O Concello de Mos conta cun dos 84 CIMs existentes en Galicia e forma parte, ademais, da Rede de entidades locais contra a violencia de xénero que promove a Administración autonómica.
Tal e como recordou Rivo, a Xunta está a incidir na concienciación e formación en materia de igualdade, con axudas a mulleres e mozas que foron vítimas dalgún tipo de discriminación ou violencia, con recursos para poñer en valor o traballo das mulleres e con actividades nos centros educativos para promover a equidade efectiva en todos os aspectos da vida.