Santiago de Compostela, 8 de marzo de 2024

A Consellería de Infraestruturas e Mobilidade licitou hoxe as obras de mellora do firme nas estradas PO-206 e PO-905 ao paso polos concellos de Lalín e de Vila de Cruces, cun investimento de 2.668.466 euros.

Trátase de executar a renovación do firme da calzada nalgúns dos treitos da PO-206, entre os puntos quilométricos 0 e 16+310; e na estrada PO-905 entre os quilómetros 0 e 4+500, mellorando as súas características actuais.

A Plataforma de Contratos Públicos de Galicia recolle a licitación destas obras e establece como prazo ata o 3 de abril para que as empresas interesadas poidan presentar as súas ofertas.

O obxectivo da Xunta é adxudicar as obras no mes de xuño e executalas entre o verán e o outono.

Os traballos contan cun prazo de 9 meses e a lonxitude total da actuación rolda os 21 quilómetros.

En concreto, as actuacións previstas na PO-206 comprenden o treito inicial da estrada no tramo de algo máis de 16,3 quilómetros no seu percorrido polo municipio de Lalín, ata o quilómetro 13+420. Neste punto comezan as intervencións no treito de preto de 3 quilómetros da estrada ao seu paso polo concello de Vila de Cruces.

No caso da intervención na PO-905, os traballos céntranse no tramo inicial desta estrada, de 4,5 quilómetros, que atravesa o concello de Vila de Cruces.

As obras consistirán na reparación do firme mediante fresado e reposición das zonas localizadas que se atopen deterioradas e a aplicación dunha nova capa de rodaxe ou microaglomerado nalgúns treitos nos que sexa preciso.

Como complemento a estes traballos, reporanse as marcas viarias, símbolos e cebreados en todo o treito das actuacións na PO-206 e na PO-905 e procederase á colocación de elementos de balizamento e reposición de captafaros.

O Goberno galego continúa a traballar para manter as vías de titularidade da Xunta nas mellores condicións e para garantir a seguridade viaria aos usuarios, destinando o vindeiro ano 53 M€ á súa conservación.