Santiago de Compostela, 6 de marzo de 2024

O Diario Oficial de Galicia (DOG) publica hoxe o anuncio da Consellería do Medio Rural polo que se acorda someter a información pública o proxecto de decreto polo que se crea e regula o Sistema voluntario de créditos de carbono da Xunta.

O prazo polo que se someterá a norma a información pública será de vinte días hábiles contados desde mañá, día seguinte ao da publicación deste anuncio no DOG. O texto do proxecto de decreto poderá consultarse no portal de transparencia da Xunta na seguinte localización: Normativa en tramitación - En prazo de envío de suxestións - Portal transparencia (xunta.gal) https://transparencia.xunta.gal/tema/informacion-de-relevancia-xuridica/normativa-en-tramitacion/en-prazo-de-envio-de-suxestions.

De acordo con este proceso de exposición pública, as persoas físicas e xurídicas interesadas e a cidadanía en xeral poden facer as suxestións que consideren oportunas a este proxecto de decreto no devandito portal de transparencia.

O proxecto de decreto

Este proxecto de decreto permitirá a creación dun mercado voluntario de créditos de carbono propio da nosa comunidade, unha iniciativa na que están implicadas a Vicepresidencia segunda e Consellería de Medio Ambiente, Territorio e Vivenda e a  Consellería do Medio Rural, esta última a través da Axencia Galega da Industria Forestal.

Máis en concreto, facilitarase a creación e regulación do devandito sistema voluntario, así como a definición da súa estrutura e organización e a regulación das obrigas e dereitos das persoas participantes, tanto ofertantes como demandantes. Tamén se establecen os requisitos para a verificación e a certificación por terceiras persoas das eliminacións de dióxido de carbono, a xestión dos sistemas de certificación e o funcionamento dos rexistros.

Farase todo a través dun sistema auditado, transparente e co aval da administración autonómica, ofrecendo garantía e lexitimidade aos compradores. O mercado diríxese e organizacións públicas e privadas, mesmo á cidadanía, que aposten por compensar a súa pegada climática e camiñar cara a neutralidade, coa participación en proxectos que contribúen á eliminación ou secuestro de carbono.

No caso das empresas, este novidoso mercado permitiralles mercar créditos de carbono verificados e, deste xeito, acadar obxectivos de neutralidade chave para o seu futuro en determinadas producións e mercados, ademais de amosar o seu compromiso co medio ambiente e a sustentabilidade.

Este sistema é un modo de fomentar a concienciación social sobre a importancia de coidar as nosas contornas e crear unha nova fonte de ingresos a silvicultores e gandeiros de Galicia para que complementen as súas rendas actuais, loitando contra o abandono de terras e os incendios forestais.

Entre os obxectivos que se perseguen están o de contribuír á mitigación de gases de efecto invernadoiro, á descarbonización da economía no territorio autonómico e ao cumprimento dos compromisos nacionais e internacionais asumidos por Galicia. Trátase de incidir na sustentabilidade da xestión forestal, nas prácticas agrogandeiras ou na construción, de forma que este novo mercado desenvolverá metodoloxías pioneiras en España e con escasos precedentes en Europa.

Ligazón ao anuncio no DOG:

https://www.xunta.gal/dog/Publicados/2024/20240306/AnuncioG0426-050324-0001_gl.html