O Teatro Principal de Ourense presenta a carteleira do primeiro semestre de 2023 coa colaboración da Xunta nas funcións da Rede Galega de Teatros e Auditorios
O director de Industrias Culturais, Jacobo Sutil, participou no anuncio desta nova oferta de artes escénicas e musicais, que inclúe a programación das montaxes Patriotas, Adictos e Unha inimiga do pobo a través do circuíto autonómico e do espectáculo do Centro Dramático Galego Un hotel de primeira sobre o río
Avanzou que está previsto que a Rede supere as 520 representacións entre os meses de xaneiro e xuño, nas que o Goberno galego e as entidades locais adheridas investirán preto de 1,8 millóns de euros
Ourense, 20 de decembro de 2022
O Teatro Principal de Ourense fixo pública hoxe a programación que desenvolverá durante o primeiro semestre de 2023, conformada por máis de 30 espectáculos de artes escénicas e musicais. A Xunta de Galicia mantén a súa colaboración co espazo da Deputación ourensá a través da Rede Galega de Teatros e Auditorios, circuíto cofinanciado pola Consellería de Cultura, Educación, FP e Universidades e as arredor de 40 entidades locais asociadas, que desta volta presentará na cidade das Burgas as montaxes teatrais Patriotas, de Unahoramenos Producciones; Adictos, de Pentación, e Unha inimiga do pobo, de Talía Teatro.
Vinte representacións na provincia
Na provincia de Ourense serán 20 as representacións dentro deste circuíto, do que tamén forman parte o Teatro Municipal Lauro Olmo do Barco de Valdeorras, o Centro Cultural Avenida da Rúa e o Auditorio Municipal Manuel María do Carballiño.
Ademais desta colaboración, o Centro Dramático Galego tamén forma parte da nova carteleira do Teatro Principal, onde estará o 16 de maio para representar Un hotel de primeira sobre o río, de Xohana Torres. A compañía da Xunta está a preparar esta montaxe, baixo a dirección artística de María Torres e Gonçalo Guerreiro, que suporá a primeira produción profesional deste texto da recoñecida escritora galega.
En canto á programación da Rede Galega de Teatros e Auditorios, no Principal arrancará o 28 de xaneiro co espectáculo Patriotas, de Julio Salvatierra, con dirección de Mario Vega. A compañía canaria Unahoramenos Produciones presenta esta ficción sobre o auxe dos populismos, que interpretan Marta Viera e Saray Castro.
Pola súa banda, Lola Herrera, Lola Baldrich e Ana Labordeta porán en escena o 26 de febreiro Adictos, que aborda a dependencia tecnolóxica da sociedade actual e reivindica a capacidade de reacción dos seres humanos. Magüi Mira dirixe esta proposta de Pentación a partir do texto de Daniel Dicenta Herrera.
A compañía galega Talía Teatro chegará ao Teatro Principal ourensán o 25 de marzo coa súa adaptación da obra de Henrik Ibsen Unha inimiga do pobo, producida co apoio da Xunta a través das axudas á creación escénica de 2022. Tito Asorey dirixe esta montaxe, para a que conta coas interpretacións de Marta Lado, Toño Casais, Dani Trillo, Rubén Prieto, Marta Ríos, María Ordóñez, Diego Rey, Artur Trillo e Xurxo Barcala.