A Xunta iniciará en xaneiro as obras de mellora de eficiencia enerxética no edificio da delegación da Xunta na Coruña por un importe de 1,8 M€

O delegado da Xunta na Coruña, Gonzalo Trenor, presentou hoxe  as obras, que se iniciarán en xaneiro, para mellorar a eficiencia enerxética do edificio da Xunta en Monelos por un importe de máis de 1,8 millóns de euros e un prazo de execución de seis meses. As actuacións serán financiadas cos fondos europeos Feder Galicia 2014-2020.

Os traballos previstos inclúen a instalación de dúas caldeiras de biomasa e a mellora do sistema de control e a substitución dos equipos de iluminación existentes por luminarias LED de alta eficiencia reguladas con detectores de luminosidade de presenza e movemento.

Trenor lembrou que esta obra se enmarca na aposta da Xunta por modernizar e acondicionar as infraestruturas destinadas á prestación de servizos públicos con actuacións que permiten reducir o consumo de enerxía e dotar ao persoal e á cidadanía de mellores medios. De feito, desde 2015 o investimento da Administración autonómica en melloras de eficiencia enerxética dos seus edificios administrativos en Galicia achégase aos 18 millóns de euros, a maiores do previsto para a delegación territorial da Coruña.

Renovación e modernización

En definitiva, trátase de continuar avanzando na modernización e renovación das infraestruturas administrativas da Xunta e na posta en marcha de novas tecnoloxías coas que obter importantes aforros económicos e de enerxía, ao reducirse a emisión de CO2 e o consumo de quilovatios.

O representante do Goberno galego lembrou as distintas actuacións que a Xunta de Galicia está levando a cabo na cidade e que prestan servizos directos á cidadanía, concretamente, no edificio de Mobilidade da Estación de Autobuses estase a investir máis dun millón de euros na reforma interior e exterior da mesma, en breve iniciarase a reforma da oficina de emprego de Monelos cun investimento de máis de 1,2 millóns de euros para ofrecer uns espazos máis amplos e modernos e que permitirán aumentar en 5 persoas o persoal actual.

Trenor tamén lembrou que esta cidade conta desde hai pouco máis dun ano co novo Espazo Amizar, un edificio administrativo novo que conta con 300 funcionarios e presta servizo no ámbito do emprego e de política social, no que a Xunta investiu máis de 7 millóns grazas ao cal conseguiuse aforrar máis de 750.000 euros ao ano en alugueiros.

En definitiva, apuntou o delegado, “trátase de continuar avanzando na modernización e renovación das infraestruturas administrativas da Xunta para ofrecer máis e mellores servizos á cidadanía”.

Na presentación participou tamén a secretaria xeral técnica da Vicepresidencia Segunda e Consellería de Presidencia, Xustiza e Deportes, Elena Muñoz, quen incidiu na aposta do Goberno galego pola mellora de distintas infraestruturas administrativas, con distintos proxectos como é o caso agora de Monelos.

Nesta liña destacou especialmente as actuacións de mellora enerxética co Plan de aforro e eficiencia enerxética no sector público autonómico de Galicia 2022-2024, aprobado recentemente e que permitirá “un aforro medio de 11 millóns de euros anuais na factura enerxética da Administración galega e das súas entidades”. “Dáselle así resposta ás directrices europeas para establecer estratexias a longo prazo que permitan renovar o parque edificatorio das administracións públicas cara á súa descarbonización”, engadiu.

Tamén da continuidade ao Plan de eficiencia enerxética nos edificios administrativos da Xunta de Galicia 2016-2018, no marco orzamentario do Programa Operativo FEDER para o período 2014-2020, que supuxo investimentos de 26,3 millóns de euros, dos que 6,3 millóns corresponden a edificios xudiciais e 19,4 millóns a infraestruturas administrativas.

Ademais, cómpre lembrar que as actuacións presentadas hoxe sobre o edificio administrativo de Monelos xunto coas previstas na delegación territorial da Xunta en Ferrol, suporán unha achega de 3 millóns de euros en 2023. Tamén no edificio administrativo da Xunta en Lugo se investiron outros 2 millóns de euros en melloras de eficiencia enerxética que están a piques de rematar. A estas contías súmanse outros 500.000 euros para actuacións tamén de eficiencia enerxética nos edificios xudiciais de Noia e Marín ademais doutras novas actuacións nas envolventes de distintos xulgados e de renovación da súa iluminación e ventilación.