A Xunta adxudica por case 1,9 M€ as obras da nova depuradora e de mellora do saneamento na parroquia de Arca, no concello do Pino
A actuación beneficiará a 5 núcleos desta parroquia: O Pedrouzo, A Igrexa, Vilaboa, A Rúa e Santo Antón, que na actualidade contan con dúas fosas sépticas que funcionan deficientemente, provocando vertidos frecuentes ao medio
A nova depuradora situarase no lugar onde se atopa a fosa séptica da vertente leste, na contorna do rego do Burgo, e executarase unha estación de bombeo na zona oeste que descargará no colector existente
A infraestrutura estará dimensionada para 3.000 habitantes, co fin de atender as necesidades dos veciños e as derivadas do turismo asociado ao Camiño de Santiago
A intervención conta cun prazo de 18 meses, 12 para a execución das actuacións e 6 de posta en servizo, para confirmar o correcto funcionamento das novas instalacións
A Xunta continúa apoiando aos concellos, consciente das dificultades técnicas e financeiras que os municipios máis pequenos teñen para impulsar estas infraestruturas
A Consellería de Infraestruturas e Mobilidade, a través de Augas de Galicia, adxudicou por 1.876.032 euros as obras de execución dunha nova depuradora e de mellora do saneamento de varios núcleos da parroquia de Arca, no concello do Pino.
A intervención conta cun prazo de 18 meses, 12 para a execución das actuacións e 6 de posta en servizo, para confirmar o correcto funcionamento das novas instalacións.
Para garantir aos veciños un sistema de depuración das augas residuais máis eficiente, construirase unha estación depuradora no lugar onde se atopa a fosa séptica da vertente leste, na contorna fluvial do rego do Burgo. Para levar as augas residuais desde a zona oeste ata esa nova depuradora executarase unha estación de bombeo coa súa impulsión, que descargará no colector por gravidade que xa hai actualmente.
Unha vez executadas estas obras, a depuradora e o novo bombeo, demoleranse as 2 fosas sépticas existentes.