Rueda anima a visitar este Nadal o Belén de Begonte que celebra o seu cincuenta aniversario
O presidente da Xunta asistiu á inauguración desta instalación, declarada de Interese Turístico Galego e que atrae cada ano ao redor de 40.000 visitantes a esta vila chairega
Begonte (Lugo), 02 de decembro de 2022 O presidente da Xunta, Alfonso Rueda, animou hoxe a visitar este Nadal o Belén de Begonte, declarado de Interese Turístico Galego, e que celebra este ano o seu cincuenta aniversario nesta vila chairega.
Rueda asistiu á inauguración desta instalación, da que resaltou a súa singularidade e orixinal sistema de animación que fai que se teña convertido nun referente do Nadal galego. Así, salientou que o Belén de Begonte transcende a súa orixe relixiosa e forma parte do patrimonio cultural de Galicia, ata o punto de que atrae cada ano ao redor de 40.000 visitantes.
O mandatario galego tamén considerou que o Belén de Begonte reflicte valores cos que facilmente se poden identificar todos os galegos e galegas. Entre eles, apuntou o traballo en equipo de toda a veciñanza, que cada ano fan novas pezas de xeito voluntario; a aposta pola tradición e innovación que se percebe na actualización do seu mecanismo de funcionamento e o interese por seguir mellorando e actualizándose.
Imaxes relacionadas
