A Xunta avoga por unir esforzos entre administracións públicas e axentes privados para impulsar as axendas urbanas co reto de facer territorios máis inclusivos

A Xunta de Galicia defendeu a necesidade de unir esforzos entre administracións públicas e o sector privado para impulsar e promover as Axendas Urbanas en todo o país co reto común de conseguir territorios máis inclusivos e cohesionados.

Así o expuxo a directora xeral de Ordenación do Territorio e Urbanismo, Encarnación Rivas, quen participa desde onte en representación da Xunta no XXI Congreso de Urbanismo de Euskadi, unha cita de gran relevancia a nivel nacional e que nesta edición se celebra baixo o lema Territorios e cidades inclusivos para non deixar a ninguén atrás.

A este respecto, a directora xeral incidiu na necesidade de que os plans de acción específicos autonómicos, as iniciativas locais e as propostas promovidas polos axentes económicos e sociais se complementen entre si, de xeito que xuntos poidan impulsar a concienciación e a aceptación das Axendas urbanas territoriais como elemento clave de cara ao futuro.

Así, Rivas subliñou que as desigualdades existentes entre diferentes grupos sociais e individuos teñen, na maioría dos casos, unha marcada relación cos espazos que habitan. Esta relación entre a desigualdade e o espazo habitado se manifesta en diferentes sectores e escalas, cun carácter transversal.

Neste sentido, o congreso centrouse en analizar o potencial das intervencións que abordan as desigualdades sociais para acadar cidades e territorios máis cohesionados e sostibles a través de debates organizados ao redor de catro bloques nos que diferentes axentes tiveron ocasión de dialogar sobre a fenda social; os territorios equilibrados, prosperidade e oportunidades no continuo urbano-rural; cidades máis sostibles: inclusión social e equidade; e un novo contrato social para acadar estes obxectivos.