A Xunta lanza a cuarta edición do programa educativo Escola Verde para fomentar actitudes responsables co medio ambiente entre a comunidade escolar
No curso 2022-2023 participan nove centros educativos, dos cales seis cooperan por primeira vez, mentres que o CEIP Plurilingüe O Ruxidoiro (Barbadás), CEIP Plurilingüe A Ramallosa (Teo) e o IES de Valga (Valga) repiten experiencia
Cada colexio escolle unha temática relacionada co medio ambiente para traballar, con propostas innovadoras como a pegada ecolóxica e os gases de efecto invernadoiro
Santiago de Compostela, 19 de novembro de 2022 A Xunta de Galicia lanzará este mes a cuarta edición do programa educativo Escola Verde, unha iniciativa concibida para acadar cambios en certos comportamentos e fomentar actitudes responsables coa contorna e o medio ambiente entre a comunidade escolar galega.
No curso 2022-2023 están inscritos nove centros de educación infantil, primaria e secundaria —seis participan por primeira vez e tres repiten experiencia— que aglutinan preto de 1.600 alumnos. Entre eles, cómpre subliñar o caso do CPR Plurilingüe Padre Míguez, que participa nas tres etapas educativas, así como o do CEIP Plurilingüe O Ruxidoiro, de Barbadás, e o IES de Valga, que repiten experiencia e, ademais, impulsarán actividades colaborativas entre o alumnado de ambos colexios.
O programa Escola Verde, impulsado pola Consellería de Medio Ambiente, Territorio e Vivenda, arrancará de forma oficial cunha xornada formativa telemática, que se celebrará este mesmo mes de novembro e vai dirixida aos 130 profesores encargados de coordinar a iniciativa nesta edición.
Para lograr os obxectivos do programa, cada centro participante ten que escoller unha temática medioambiental sobre a que traballar durante todo o curso escolar co fin de concienciar aos alumnos no respecto pola biodiversidade e a natureza que os rodea desde as idades máis temperás.
Entre as propostas recibidas no marco desta cuarta edición destacan propostas sobre temas innovadores como a análise da pegada ecolóxica e os gases de efecto invernadoiro (GEI), presentada polo CEIP O Cantel, do municipio lucense de Foz.
Por último, cómpre lembrar que Escola Verde, xunto con MeteoEscolas, é un dos programas recollidos no Plan Proxecta+, unha iniciativa da Consellería de Cultura, Educación e Universidades na que colaboran diferentes organismos e que está pensada para fomentar a innovación educativa nos centros escolares, así como potenciar o traballo cooperativo, interdisciplinar e competencial en diferentes áreas.
Na seguinte táboa indícanse os centros de ensino participantes no curso 2022-2023, así como a temática de traballo proposta.
Nº | Centro educativo | Concello | Temática |
1 | CPR Plurilingüe Padre Míguez | Vigo | O natural é circular |
2 | CEIP O Areal | Camariñas | Comando verde no Areal |
3 | CEIP Plurilingüe de Toques | Toques | Brotes verdes |
4 | CEIP Plurilingüe O Ruxidoiro | Barbadás | Ruxiverdece continua |
5 | CEIP O Cantel | Foz | Decrecer. O Cantel ecosocial |
6 | CEIP Plurilingüe Antonio Fernández López | Sarria | Coidamos os nosos espazos |
7 | IES de Valga | Valga | Mudamos o noso centro |
8 | CEIP A Ramallosa | A Ramallosa | Ramalloseir@s coa natureza |
9 | CEIP de Mosteiro-Bembrive | Vigo | Mosteiro Punto Limpo |