A Xunta activa o convenio de emerxencias con UNICEF para facerlle fronte á crise humanitaria en Ucraína
O Goberno galego destina 30.000 euros para a adquisición e distribución de kits básicos de emerxencia e para a atención de partos, así como de subministracións nutricionais
O obxectivo é a mellora das condicións de vida da infancia afectada pola guerra
A Xunta vén de activar o convenio de emerxencias con UNICEF para facerlle fronte á crise humanitaria en Ucraína. O Goberno galego destina 30.000 euros a esta intervención co obxectivo de mellorar as condicións de vida da infancia afectada pola guerra.
A iniciativa centrarase na adquisición e distribución de kits básicos de emerxencia deseñados para proporcionarlles atención a 10.000 persoas durante tres meses. Tamén se van adquirir e distribuír kits para atender un cento de partos, así como subministracións nutricionais. Deste xeito búscase dotar os centros de saúde, hospitais e outros lugares de refuxio con recursos sanitarios e de nutrición esenciais para garantir a atención das persoas máis vulnerables.
A activación do convenio responde á necesidade de paliar o grande impacto do conflito bélico sobre as familias e, de xeito especial, sobre mulleres e nenos, xa que o acceso á asistencia sanitaria se segue vendo gravemente afectada pola inseguridade, a mobilidade restrinxida, a ruptura das cadeas de subministración e os desprazamentos masivos.
Colaboración con UNICEF
Cómpre sinalar que UNICEF é a principal organización internacional que traballa a prol dos dereitos da infancia e de conseguir cambios reais nas vidas de millóns de menores en calquera situación de emerxencia ou crise humanitaria. A Xunta vén colaborando desde hai anos con esta organización, tanto no financiamento de actuacións de acción humanitaria e de emerxencias como de actuacións de cooperación no exterior. Desde 2012 ata este ano concedeulle máis de 1,4M€ en axudas.