Un total de 11 empresas da área de Santiago do sector agroalimentario recibirán máis de 4M€ en axudas para a transformación e comercialización de produtos agrarios
O delegado da Xunta e a alcaldesa visitaron a empresa Lácteos Ferrado Verde, unha das beneficiarias con máis de 100.000 euros para levar a cabo a renovación tecnolóxica das súas instalacións
O seu obxectivo principal é crear novas industrias agroalimentarias, así como mellorar as xa existentes
Santa Comba (A Coruña), 10 de novembro de 2022 O delegado da Xunta na Coruña, Gonzalo Trenor, acompañado pola alcaldesa de Santa Comba, María Pose, e polo xefe territorial da Consellería do Medio Rural, José Manuel Santos Maneiro, visitaron a empresa Lácteos Ferrado Verde, unha das beneficiarias con máis de 100.000 euros da orde de axudas para levar a cabo investimentos en transformación e comercialización de produtos agrarios cofinanciadas co Fondo Europeo de Desenvolvemento Rural (Feader). Estas axudas repartirán entre 11 empresas da área de Santiago máis de 4 millóns de euros que mobilizarán en investimentos nesta área máis de 11 millóns de euros.
Así, esta orde de axudas busca incentivar os investimentos en activos fixos materiais para a creación, ampliación e modernización das instalacións situadas en Galicia destinadas á transformación e comercialización de produtos agrarios. No caso das subvencións, consistiron en axudas para a execución deses proxectos, mentres as garantías para préstamos consistiron en garantías do 80% do risco inherente a cada empréstito formalizado destinado a financiar os investimentos.
Para iso, foron suxeito de subvención actuacións como a construción, adquisición e mellora de bens inmobles, así como a compra de terreos ata un valor inferior ao 10% do total dos gastos subvencionables. Tamén, estas achegas sufragarán a compra de maquinaria e equipamentos novos, a adquisición de programas informáticos e de patentes ou licenzas relacionadas cos procesos produtivos.
Ademais, como novidade, deuse prioridade ás asociacións de produtores que se uniron para levar investimentos en común. Deste xeito, concedéuselles a máxima puntuación no apartado de beneficio a produtores dos criterios de valoración ás cooperativas agrarias galegas ou ás sociedades participadas maioritariamente (máis do 50%) por cooperativas agrarias galegas ou por asociacións e organizacións de produtores da nosa comunidade.
BENEFICIARIO | OBXETO PROXECTO | CONCELLO | INV.SUBVENC. | AXUDA |
COOP LACTEAS UNIDAS SCG | MELLORAS TECNOLÓXICAS EN FÁBRICA DE PENSOS | AMES | 622.516,71 € | 186.755,01 € |
QUEIXERÍA BARRAL, S.L.U. | AMPLIACIÓN E MELLORAS TECNOLOXICAS EN FÁBRICA DE QUEIXOS | ARZUA | 90.084,60 € | 31.529,61 € |
MATADERO DEL SAR, S.L. | AMPLIACIÓN E MELLORAS EN INDUSTRIA CARNICA | DODRO | 4.557.258,68 € | 1.595.040,54 € |
CENTRAL DE FRADES SCG | MELLORAS TECNOLOXICAS E AMPLIACIÓN DE ALMACEN EN FABRICA DE PENSOS | FRADES | 264.999,61 € | 92.749,86 € |
ECOCENTRO SC | MELLORAS TECNOLÓXICAS CENTRO CLASIFICACIÓN E ENVASADO OVOS | MELIDE | 2.168.692,51 € | 759.042,38 € |
AVÍCOLA GRAO S.L. | MELLORAS EN MATADOIRO E SALA DE DESPECE DE AVES | MELIDE | 721.451,02 € | 180.362,76 € |
DAIRYLAC, S.L. | MELLORAS TECNOLÓXICAS EN INDUSTRIA LÁCTEA | MELIDE | 885.977,14 € | 354.390,86 € |
COOP LACTEAS UNIDAS SCG | MELLORAS TENCOLÓXICAS EN FÁBRICA DE PENSOS | MELIDE | 60.417,00 € | 21.145,95 € |
XALLAS DE SANTA COMBA SCG | MELLORAS TECNOLÓXICAS EN FÁBRICA DE PENSOS | SANTA COMBA | 125.850,00 € | 44.047,50 € |
LÁCTEOS FERRADO VERDE, S.L. | MELLORAS TECNOLÓXICAS EN QUEIXERÍA | SANTA COMBA | 305.076,20 € | 106.776,67 € |
QUEIZUAR SL | AMPLIACIÓN EN FÁBRICA DE QUEIXOS | TOURO | 2.057.088,93 € | 719.981,13 € |
AXUDAS 11 | 11.859.412,40€ | 4.091.822,27€ |