A Xunta regulará un rexistro de axentes intermediarios no eido da vivenda para dotar de seguridade xurídica ao sector

A Xunta de Galicia iniciará a elaboración da normativa que regulará un rexistro no que deberán inscribirse os intermediarios que actúan no sector da vivenda, tal como indicou o director xeral do Instituto Galego de Vivenda e Solo (IGVS), Heriberto García, na reunión que mantivo esta mañá co presidente do Colexio oficial de administradores de fincas de Galicia, Martín Bermúdez de la Puente, e coa presidenta do Colexio oficial de axentes da propiedade inmobiliaria, Patricia Vérez Cotelo.

Logo de explicar que esta regulación dá resposta a unha demanda do propio sector, e que, de feito, a Xunta contará cos axentes da propiedade inmobiliaria e cos administradores de fincas na súa elaboración, o director do IGVS incidiu en que o obxectivo é ofrecer seguridade xurídica aos usuarios dos servizos destes intermediarios.

Ademais, tamén se proporcionará transparencia ao sector co coñecemento público de todas as persoas e empresas que interveñen na intermediación en materia de vivenda e fomentar a calidade dos servizos que ofrecen ditos intermediarios.

Así, no rexistro deberán inscribirse as persoas físicas ou xurídicas que se dediquen de forma habitual e retribuída a prestar servizos de mediación e asesoramento inmobiliario tales como a participación en operacións de compravenda, arrendamento, opción de compra, etc. de bens inmobles ou a ofrecer de servizos de administración e asesoramento aos titulares de bens inmobles e ás comunidades de propietarios.

A maiores, durante a reunións tamén abordaron tanto o estado de tramitación das axudas en materia de eficiencia enerxética para vivendas e edificios de vivendas como as convocatorias previstas no ano 2023 incluídas nos orzamento do Instituto Galego da Vivenda e Solo para o ano próximo.