Galicia é a comunidade autónoma con menos temporalidade no emprego público

O conselleiro de Facenda e Administración Pública, Miguel Corgos, subliñou hoxe que Galicia é a Comunidade Autónoma de España con menos temporalidade no emprego público, xa que tal e como explicou, a redución da taxa de temporalidade é unha prioridade para o Goberno galego.

Así o expuxo no Pleno do Parlamento galego durante a presentación do proxecto de Lei de medidas urxentes para a redución da temporalidade no emprego público en Galicia onde sinalou ademais, que coa incorporación de persoal fixo nas prazas de estabilización, máis as prazas xa convocadas, a taxa de temporalidade situarase por debaixo do obxectivo do 8% fixado pola lexislación do Estado.

Durante a súa intervención, o conselleiro explicou que este proxecto de Lei é necesario e urxente pois ten como obxectivo principal axilizar e dotar de seguridade xurídica aos procesos de estabilización que se desenvolverán ao abeiro da Lei 20/2021 do 28 decembro, de medidas urxentes para a redución da temporalidade no emprego público.

Ademais, tamén ten entre os seus obxectivos salvar todas as eivas e imprecisións que contén a lei estatal e garantir a convocatoria antes do 31 de decembro deste ano de todos os procesos de estabilización que se desenvolverán no marco desta normativa.

Miguel Corgos subliñou que o texto presentado hoxe foi amplamente consensuado cos representantes dos empregados públicos, e contou co voto favorable de tres das catro organizacións sindicais que forman parte da Comisión de Persoal (CC.OO., UXT e CSIF).

Entre outros aspectos este proxecto de Lei recolle os criterios de baremación para os procesos de estabilización; a puntuación que representará a fase de oposición naqueles procesos que se realicen mediante o sistema de concurso-oposición ou a data de valoración dos méritos.

Por outra banda, o texto tamén indica que só se valorarán os servizos prestados no grupo, escala ou categoría profesional obxecto da convocatoria; que se lle outorgará unha valoración superior aos servizos prestados na propia Administración autonómica ou o feito de que a Xunta poderá aprobar unhas bases comúns para estes procesos selectivos, e nomear un ou varios tribunais nos procesos de concurso.

Procesos de estabilización

A lei estatal 20/2021 do 28 de decembro distingue dous tipos de procesos: un de estabilización mediante o sistema de concurso de méritos no que se valorarán exclusivamente os méritos, e outro a través do sistema de concurso-oposición que comporta a realización de exames.

O primeiro dos procesos empregarase para ofertar todas as prazas que estivesen ocupadas de forma temporal e de xeito ininterrompido con anterioridade ao 1 de xaneiro de 2016, mentres que o segundo será de aplicación ás prazas ocupadas de forma temporal e ininterrompidamente polo menos os tres anos anteriores ao 31 de decembro do ano 2020.

Neste marco, a Xunta xa aprobou o pasado mes de maio os decretos de Oferta de Emprego Público (OEP) da Administración Pública nos que se inclúen un total de 10.338 prazas para este proceso de estabilización de emprego. Delas, 8.703 seleccionaranse polo sistema de concurso de méritos e outras 1.635 a través dun concurso-oposición.