A Axencia Galega de Desenvolvemento Rural contará en 2023 cun 21% máis de orzamento para continuar aplicando a Lei de recuperación da terra agraria

Santiago de Compostela, 4 de novembro de 2022 A Axencia Galega de Desenvolvemento Rural, dependente da Consellería do Medio Rural, aumentará o ano vindeiro un 21% o seu orzamento con respecto a este 2022, acadando unha cifra global de 57,1 millóns de euros que se destinarán en boa parte a continuar aplicando a Lei de recuperación da terra agraria. Así o sinalou a directora xeral da Axencia, Inés Santé, que compareceu no Parlamento para dar detalles sobre un presuposto que -segundo dixo- corrobora que as contas deste ente se incrementaron nun 40% nos últimos dous anos.

Na súa intervención, a directora xeral apuntou que o orzamento de 2023 da Axencia Galega de Desenvolvemento Rural contén tanto investimento directo para a aplicación dos instrumentos de ordenación, mobilización e recuperación de terras, como novas liñas de axuda para actuacións vinculadas a estes instrumentos. Con todo, hai máis puntos destacables, segundo relatou, como os relativos á planificación e dinamización do rural e os do programa Leader.

Recuperación

Nesta epígrafe, Inés Santé afirmou que se consignaron 5,9 millóns de euros para o desenvolvemento de instrumentos de recuperación da terra agraria, un 11% máis ca en 2022. Eses cartos distribúense en 4,4 millóns para a elaboración de proxectos e realización de obras de polígonos agroforestais e aldeas modelo e 1,5 millóns para a recuperación da terra agraria nas zonas afectadas este ano por grandes incendios.

A estes fondos hai que sumar outro millón de euros para o desenvolvemento dos procedementos e instrumentos da Lei de recuperación, en concreto, para mellorar o funcionamento do Banco de terras e para implementar ferramentas informáticas que faciliten a aplicación das figuras de posta en valor, así como a participación da cidadanía ao respecto. Nesa liña, en colaboración coa Axencia para a Modernización Tecnolóxica de Galicia estase traballando nunha completa aplicación para a xestión de aldeas modelo, polígonos agroforestais e agrupacións de xestión conxunta, así como dos procedementos de investigación da titularidade e de declaración de abandono.

Como novidade, a directora xeral afirmou que en 2023 se desenvolverán actuacións na parte edificada de distintas aldeas modelo, con case 1 millón de euros para a elaboración de catro proxectos piloto de Plans de dinamización dos núcleos rurais das aldeas de Muimenta (Carballeda de Avia), Penedo (Boborás), Osmo (Cenlle) e Trascastro (O Incio) e outros preto de 1,2 millóns para unha liña de axudas que promova a elaboración destes plans noutras aldeas.

Así mesmo, en 2023 crearase un novo proxecto contable para a iniciativa de compra pública de innovación Aldeas intelixentes, co obxectivo de licitar tres contratos -cun orzamento plurianual de 5 millóns de euros- co gallo de desenvolver sistemas de axuda á decisión para as actividades agrarias desenvolvidas nas aldeas modelo, unha plataforma para asegurar a trazabilidade das producións agropecuarias e dos subprodutos e residuos das aldeas co fin de fomentar a economía circular e comunidades enerxéticas locais baseadas en enerxías renovables.

Para seguir avanzando na implementación de aldeas modelo, e tamén de polígonos agroforestais, convocaranse tamén máis de 2 millóns de euros en achegas para servizos básicos locais nas zonas onde se impulsen estas figuras, o dobre deste ano. A maiores, prevese rematar a elaboración do Mapa de usos agroforestais de Galicia, para o que se conta con 234.000 euros; e seguirase traballando na ordenación de usos, cun orzamento de case 600.000 euros para a elaboración de catálogos de solos agropecuarios e forestais e para a elaboración de plans integrais, como o xa anunciado Plan estratéxico de actuación integral da área suroriental da provincia de Ourense -o Plan Monterrei-.

Dinamización do rural

No referido á planificación e dinamización do territorio rural galego, Inés Santé referiuse aos case 19,7 millóns de euros que financiarán o ano que vén o Plan de mellora de camiños municipais -un 80% máis que neste 2022-, sumando un total desde 2016 de 104 millóns para este fin, permitindo arranxar máis de 4.800 camiños de máis de 3.800 km.   

Asemade, nomeou os preto de 3,9 millóns dirixidos á creación e á modernización e/ou ampliación de actividades non agrícolas, un orzamento un 29% superior ao deste ano destinado a reforzar o tecido empresarial no ámbito rural. Dentro desta liña de axudas, incluirase -segundo dixo- unha submedida para o apoio a actividades empresariais non agrícolas vinculadas aos instrumentos de recuperación da terra agraria, buscando así a sinerxía entre o eido primario e outros sectores de actividade.

Programa Leader

Por último, no campo da cooperación, a directora xeral da Axencia Galega de Desenvolvemento Rural aseverou que o programa Leader contará cun orzamento de 16,4 millóns de euros o ano próximo, dentro dos que destacan os 10,7 millóns de euros para a implementación de actuacións dos grupos de desenvolvemento rural (GDR) en todo o territorio galego. Mentres, 4,67 millóns -un 25% máis que neste exercicio- serán para garantir a continuidade destes grupos como asesores e dinamizadores do territorio, atendendo aos seus gastos de funcionamento e animación.