A Xunta declara de utilidade pública e de interese social seis polígonos agroforestais en Leiro, Monterrei, Paderne de Allariz, Riós, Cerdedo-Cotobade e Crecente
O DOG publica hoxe os seis decretos da Consellería do Medio Rural para seguir adiante con estes procesos, que implicarán no seu conxunto case 420 hectáreas, preto de 3.700 parcelas e máis de 1.300 propietarios
Elévase así a oito o número de polígonos de iniciativa pública declarados ao abeiro da Lei de recuperación da terra agraria de Galicia, tras os de Cualedro e Oímbra que actualmente se atopan na fase de redacción do proxecto básico
O estudo de viabilidade aprobado en cada caso determinou os usos e actividades admisibles, entre os que destacan os cultivos leñosos ou de horta e os sistemas agroforestais
A día de hoxe, existen 21 polígonos de iniciativa pública en distintas fases de execución, 10 xa iniciados e 11 en fase de actuacións previas
O Diario Oficial de Galicia (DOG) publica hoxe seis decretos da Consellería do Medio Rural polos que se declaran de utilidade pública e de interese social os polígonos agroforestais de Barzamedelle (Leiro), Vences (Monterrei), Solbeira (Paderne de Allariz), Pousada (Riós), Vilalén-Tomonde (Cerdedo-Cotobade) e Mandelos (Crecente), para poñer en valor unha superficie total de case 420 hectáreas. Elévase así a oito o número de polígonos de iniciativa pública declarados na nosa comunidade ao abeiro da Lei de recuperación da terra agraria de Galicia, tras os de Cualedro e Oímbra iniciados o ano pasado que actualmente se atopan na fase de redacción do proxecto básico.
Neste senso, cabe sinalar que o pasado 8 de xullo saíran publicados no DOG os acordos polos que se iniciaban os procedementos de aprobación para o desenvolvemento destes seis polígonos agroforestais, os cales motivaron a elaboración dos estudos de viabilidade en cada un dos casos. Unha vez feitos e aprobados estes estudos, foi declarada a utilidade pública e interesa social por parte do Consello da Xunta e, unha vez publicada esta declaración, iniciarase a redacción do proxecto básico de cada un dos polígonos. Seguidamente, iniciarase a investigación da titularidade das fincas e os traballos de reestruturación da propiedade nas distintas áreas, de seren necesarios.
Cabe sinalar que neste caso, ao tratarse de polígonos de iniciativa pública, os procedementos serán sometidos a un proceso de concorrencia competitiva. Ademais, cómpre ter en conta que a declaración de utilidade pública e interese social implica o recoñecemento da existencia de razóns de interese público para os efectos da aplicación da tramitación de urxencia dos procedementos. Desta forma, poderase avanzar no obxectivo prioritario de poñer en produción áreas de terra agroforestal con boa capacidade produtiva que acadaron co paso do tempo estados de abandono ou infrautilización, recuperando deste xeito unha actividade agrícola ou forestal.
Así, na provincia de Ourense, no caso concreto do polígono de Barzamedelle (Leiro), recuperarase unha superficie de 145,6 hectáreas distribuídas nunhas 183 parcelas de 113 propietarios e establécense como usos ou actividades principais os cultivos leñosos, de ciclo curto e sistemas agroforestais (sistemas de aproveitamento mixto fundamentalmente gandeiro e forestal -frondosas caducifolias- e, nalgún caso, algún tipo de cultivo agrícola complementario para o aproveitamento gandeiro e compatible cos outros dous). Canto ao de Vences (Monterrei), apóstase polos cultivos leñosos nunha superficie de 22,44 ha, repartidas nuns 535 predios de 331 titulares catastrais. No que respecta ao polígono agroforestal de Solbeira (Paderne de Allariz), orientarase á gandaría nunha extensión de 43,36 hectáreas, cunhas 317 parcelas e 208 propietarios.
No que se refire ao polígono de Pousada (Riós), terá unha superficie de 93,89 ha -cuns 663 predios e 200 titulares implicados- que estarán centradas na plantación de castiñeiros. Xa na provincia de Pontevedra, o polígono de Vilalén-Tomonde (Cerdedo-Cotobade) constará de 67,88 hectáreas, unhas 1.534 parcelas e 278 propietarios, avogando polos cultivos leñosos e sistemas agroforestais. Por último, o de Mandelos (Crecente) centrarase nos cultivos leñosos, de horta e sistemas agroforestais, nunha superficie de 45,04 ha, cuns 391 predios e 183 titulares catastrais.
Cabe engadir que as causas polas que procede desenvolver estes seis polígonos son a existencia dun estado de abandono ou infrautilización dun mínimo do 50% da superficie de terras do polígono agroforestal, así como o acordo das persoas propietarias dos predios, acadando ata un 70% da superficie das terras incluídas no perímetro proposto. Nestes casos concretos, cabe resaltar que as porcentaxes de acordo roldaron o 84% de media.
21 polígonos
A día de hoxe, existen 21 polígonos de iniciativa pública en distintas fases de execución, 10 xa iniciados e 11 en fase de actuacións previas. Entre os iniciados, a maiores dos seis publicados hoxe no DOG están os de Cualedro (con 64 hectáreas e unhas 72 parcelas de 70 propietarios) e Oímbra (preto de 22 hectáreas e unhas 72 parcelas de 73 propietarios), en fase de redacción do proxecto básico. Tamén os de Curtis (3.386 ha e 6.161 parcelas) e Remuíño na Arnoia (224 ha e 6.753 parcelas), na fase de acordo de inicio.
Ademais, hai outros 11 polígonos de iniciativa pública nos que se ten iniciado un procedemento de actuacións previas, os cales suman 4.674 hectáreas e 9.750 parcelas de máis de 5.000 propietarios. Trátase dos de Ver (Bóveda), Barcia (Navia de Suarna), Prado (Castrelo de Miño), Freixido (Larouco), Panascos (Tomiño), Alta Limia, Corno do Monte e Lamas Ganade (todos eles en Xinzo de Limia), San Salvador de Sabucedo (Porqueira), A Graña de Seoane (Montederramo) e Soutopenedo (San Cibrao das Viñas).