A Xunta pon de relevo as axudas da PAC e as de plans de mellora e incorporación de mozos para contribuír ao futuro do agro galego

O director xeral de Gandaría, Agricultura e Industrias Agroalimentarias, José Balseiros, presidiu hoxe en Vila de Cruces unha xornada informativa sobre a nova Política Agraria Común (PAC) 2023-2027 e sobre outras achegas de relevancia para o sector primario. Nesa liña, destacou a importancia deste tipo de subvencións para contribuír ao futuro do agro galego. 

Na súa intervención, o director xeral recordou que a Xunta volveu convocar este ano as axudas que permitiron adiantar no verán aos agricultores e gandeiros galegos uns 200 millóns de euros das achegas da PAC, subvencionando os xuros por un importe de 3,4 millóns. Unhas achegas que, segundo recordou, se adoitan cobrar no outono e que permiten reducir as diferenzas entre a renda agraria e a urbana, á vez que potencian os agricultores realmente activos e prácticas agrícolas beneficiosas para o clima e o medio ambiente.

De cara ao próximo período, José Balseiros recordou que o Fondo Galego de Garantía Agraria (Fogga) vén de lanzar un apartado dentro da súa páxina web dedicado á PAC 2023-2027. Nel, os usuarios atoparán información útil tanto dos procedementos de cada unha das axudas como das súas novidades. Así mesmo, o apartado web inclúe no apartado SIXPAC e Monitoraxe un resumo por usos de todas as parcelas de Galicia, un enlace ao visor SIXPAC e información xeral sobre os controis de campo que realiza o Fogga. Por último, o portal ofrece un mapa interactivo de Galicia por concellos que permite consultar os importes das axudas das últimas campañas, das superficies por usos do terreo e da produción de leite.

O director xeral aproveitou para referirse a outras axudas de relevancia para o sector como as destinadas a plans de mellora nas explotacións agrarias, á creación de empresas por parte de agricultores mozos e ao desenvolvemento de pequenas explotacións, que contaron cun orzamento global de 37,5 millóns de euros este ano. Segundo salientou, con estas subvencións búscase mellorar a estrutura produtiva das explotacións galegas e avanzar na consecución dunha adecuada dimensión e un correcto equilibrio dos seus factores de produción co obxectivo de mellorar a competitividade. Ao mesmo tempo, procúrase acadar un rexuvenecemento da poboación activa agraria e o fomento do emprego neste sector, con especial consideración cara ás mulleres, co fin último de fixar poboación no rural.