Máis de 112.000 clientes descargaron xa o Bono Activa Comercio da Xunta de Galicia en pouco máis de 24 horas

O director xeral de Comercio e Consumo, Manuel Heredia, visitou hoxe en Ribadeo diferentes establecementos nos que xa se poden empregar os descontos de 30€ cos que se incentivan as compras no comercio de proximidade


A Administración autonómica destina 5M€ a este programa co que se prevé beneficiar a máis de de 160.000 clientes e mobilizar 17 millóns de euros en vendas


Os bonos poderán empregarse ata o 31 de decembro nos comercios adheridos, que nestes momentos son xa máis de 4.500 en toda a Comunidade
 

 Ribadeo (Lugo), 25 de outubro de 2022 

Máis de 112.000 clientes de toda Galicia descargaron xa o Bono Activa Comercio en pouco máis de 24 horas (onte foi o primeiro día no que puideron solicitarse estes descontos), mentres que o número de comercios adheridos supera os 4.500, dos cales preto de 190 corresponden á Mariña Lucense.

 

O director xeral de Comercio e Consumo, Manuel Heredia, realizou este mediodía unha visita a diferentes establecementos de Ribadeo, onde preto dunha trintena de negocios participan xa nesta iniciativa, á que a Xunta destina 5M€ coa previsión de chegar a mobilizar 17M€ en compras no comercio de proximidade de toda Galicia. Cada consumidor pode obter un bono de 30 euros que terá a oportunidade de utilizar ata o 31 de decembro nos negocios adheridos.

Os bonos, en formato de código QR, poden descargarse a través do móbil na web bonosactivacomercio.gal, onde tamén poden sumarse ata o 30 de novembro novos establecementos comerciais. Heredia, que estivo acompañado por representantes da Asociación de Comerciantes, Industriais, Servizos e Autónomos de Ribadeo (Acisa), lembrou que esta iniciativa busca impulsar as compras no comercio de proximidade, atraendo clientela aos establecementos locais. Ao mesmo tempo, contribúese a aliviar o impacto da inflación na capacidade de gasto dos fogares galegos.

A principal novidade deste ano é a ampliación de tramos de desconto e os importes. Así, o desconto é de 5 euros para compras a partir de 20 euros e inferiores a 30 euros; 10 euros para compras desde 30 euros e inferiores a 50; e de 15 euros se superan os 50 euros de compra.

 

Imaxes relacionadas