Conde salienta en Pantón que a dixitalización, a eficiencia e a internacionalización son obxectivos estratéxicos na axenda de Galicia a través dos Orzamentos de 2023

Pantón (Lugo), 24 de outubro de 2022 O vicepresidente primeiro e conselleiro de Economía, Industria e Innovación, Francisco Conde, salientou hoxe en Pantón que a dixitalización, a eficiencia enerxética e a internacionalización son tres dos obxectivos estratéxicos recollidos na axenda de Galicia a través dos Orzamentos de 2023. Conde participou no II Foro Think Tank, organizado xunto coa Confederación de Empresarios de Lugo (CEL) no marco do programa Conecta Lugo, e que nesta ocasión se celebrou baixo o lema Ribeira Sacra: aposta de futuro.

Na súa intervención, o vicepresidente económico sinalou que este encontro permite poñer en valor a excelencia do sector agroalimentario da zona; dos seus viños; e da aposta que se está a facer polo turismo sustentable; poñendo así en valor “que a Ribeira Sacra é Galicia Calidade”.

No acto, no que tamén participaron a directora de Turismo de Galicia, Nava Castro, e o o director da Axencia Galega da Calidade Alimentaria, José Luis Cabarcos, Conde incidiu en que a saída aos mercados exteriores é un dos grandes retos que afronta o tecido empresarial, sumado á transformación dixital e a transición enerxética.

Iso fai, segundo explicou, que a cultura da eficiencia e a sustentabilidade teñan que estar hoxe en día na axenda de calquera empresa para poder facer fronte ao impacto que o prezo eléctrico ten sobre os custos de produción.

Por iso, nos orzamentos para 2023 duplícanse os orzamentos para axudar ás familias e ás empresas a rebaixar a factura eléctrica (pasan de 40 a 75 millóns de euros). Dentro desta partida, destínanse 17 millóns de euros a incentivar o autoconsumo e as comunidades enerxéticas empresariais. E no tocante á internacionalización, destínanse 20 millóns de euros a impulsar a presenza da Marca Galicia e das empresas galegas nos mercados internacionais.

O responsable de Economía, Industria e Innovación sinalou que as prioridades do tecido empresarial galego son as da Xunta, co obxectivo de impulsar a recuperación e o crecemento da economía galega. Nesta aposta, Galicia Calidade debe sumarse aos novos retos da transición dixital e da aposta por unha economía máis sostible.

Por iso, estase a traballar para que ao longo de 2023 se poida impulsar a tecnoloxía Blockchain como un factor diferencial nas empresas que pertencen ao selo de Galicia Calidade, axudándoas na súa innovación na cadea de subministración -o que achegará garantías de trazabilidade aos consumidores- e apoiando as empresas no seu desenvolvemento dixital. Tamén se implantará un sistema de indicadores de sostibilidade que servirá para achegar valor ás empresas.

O responsable de Economía, Industria e Innovación sinalou que a Marca Galicia Calidade tamén está na forma en que a Xunta entende a xestión, ofrecendo estabilidade e certezas ao tecido empresarial, a través de instrumentos como a Lei de simplificación administrativa, a Lei de áreas empresariais e a Oficina Galicia Empresa; e de figuras administrativas como os Proxectos Industriais Estratéxicos; de Interese Autonómico e as Iniciativas Empresariais Prioritarias; que dan unha resposta administrativa áxil aos proxectos que Galicia ten en canteira e cos que aspira a fondos europeos.

Entre os grandes proxectos que se prevén na provincia de Lugo destacan a fábrica de fibras téxtiles de Altri, en Palas de Rei; a planta de Cafés Candelas; o centro de produción de biometano de Bioenergía Lugo; e os novos investimentos no Polo Aeroespacial de Galicia.