Máis de 37.000 clientes de toda Galicia descargaron xa o Bono Activa Comercio nas primeiras horas deste luns

Marín (Pontevedra), 24 de outubro de 2022 Máis de 37.000 clientes de toda Galicia descargaron xa o Bono Activa Comercio nas primeiras horas deste luns, mentres que o número de comercios adheridos superou os 4.000, dos cales máis de 1.300 corresponden á provincia de Pontevedra.

O director xeral de Comercio e Consumo, Manuel Heredia, realizou esta mañá unha visita a diferentes establecementos de Marín participantes na iniciativa que hoxe bota a andar, á que a Xunta de Galicia destina 5 M€ coa previsión de chegar a mobilizar 17M€ en compras no comercio de proximidade de toda Galicia. Cada consumidor pode obter un bono de 30 euros que terá a oportunidade de utilizar ata o 31 de decembro nos negocios adheridos.

Os bonos, en formato de código QR, poden descargarse a través do móbil na web bonosactivacomercio.gal, onde tamén poden sumarse ata o 30 de novembro novos establecementos comerciais. No caso dos clientes, hoxe é o primeiro día no que se poden descargar e utilizar os bonos, mentres que os negocios puideron anotarse ao programa desde o pasado 13 de outubro.

Heredia, que estivo acompañado polo delegado territorial da Xunta de Galicia en Pontevedra, Luis López e representantes do Centro Comercial Aberto Estrela de Marín e do Concello marinense, sinalou que un dos obxectivos desta iniciativa é incentivar as compras no comercio de proximidade, atraendo clientela aos establecementos locais. Ao mesmo tempo, contribúese a aliviar o impacto da inflación na capacidade de gasto dos fogares galegos.