A Xunta pon en valor o ecosistema de I+D+i galego na Feira Internacional Patents for Innovation de Madrid
A Vicepresidencia primeira e Consellería de Economía, Industria e Innovación conta cun mostrador institucional no que participarán máis dunha ducia de entidades de I+D+i galegas entre o 26 e o 27 de outubro
Esta acción enmárcase no programa Ignicia Transferencia de Coñecemento, promovido pola Axencia Galega de Innovación da Xunta de Galicia en colaboración coa Fundación Barrié
A Xunta de Galicia pon en valor o ecosistema de I+D+i galego na primeira feira internacional Patents for Innovation (P4I 2022), que se celebra os días 26 e 27 de outubro en Madrid e que busca ser o maior punto de encontro europeo en innovación e transferencia de tecnoloxía. Así, a Vicepresidencia primeira e Consellería de Economía, Industria e Innovación, a través da Axencia Galega de Innovación, conta cun mostrador institucional no que participarán máis dunha ducia de entidades de I+D+i galegas que presentarán as súas patentes, startups e as súas capacidades científicas. P4I 2022 naceu como un foro de innovación tecnolóxica e tamén como feira de patentes, permitindo así a creación dun espazo de intercambio de transferencia de resultados de investigación e patentes científicas.
A participación en P4I 2022 enmárcase no programa Ignicia Transferencia de Coñecemento, promovido pola Axencia Galega de Innovación en colaboración coa Fundación Barrié, e que ten como obxectivo conectar o gran potencial da ciencia excelente e o entorno empresarial para converter a investigación en solucións de mercado útiles para a sociedade.
Da man da Xunta de Galicia e da Fundación Barrié, participan no mostrador institucional a Axencia Galega de Coñecemento en Saúde (ACIS), o Instituto de Investigación Biomédica da Coruña (Inibic), o Instituto de Investigación Sanitaria de Santiago de Compostela (IDIS), o Instituto de Investigación Sanitaria Galicia Sur (IISGS), o Consello Superior de Investigacións Científicas (CSIC), as Universidades da Coruña, Santiago e Vigo, e a Alianza Tecnolóxica Intersectorial de Galicia (Atiga), que engloba ao Centro Tecnolóxico Aimen, a Anfaco-Cecopesca, o Centro Tecnolóxico de Automoción de Galicia (CTAG), Gradiant, o Instituto Tecnolóxico de Galicia (ITG), Energy Lab e o Centro Tecnolóxico de Investigación Multisectorial (Cetim).
Con esta acción, a Xunta de Galicia pon de manifesto a consolidación e a apertura tanto á sociedade como ao tecido económico do ecosistema de I+D+i galego, formado por entidades de investigación, tecnolóxicas e de apoio ao emprendemento que abordan proxectos dirixidos a todos os sectores estratéxicos da economía galega desde a xeración de coñecemento e a cultura de colaboración entre axentes.