Ethel Vázquez avanza que o vindeiro mes quedarán rematadas as obras de ampliación do aparcadoiro do Hospital Teresa Herrera da Coruña cun investimento da Xunta de 336.000 €

A conselleira de Infraestruturas e Mobilidade, Ethel Vázquez, avanzou hoxe que no vindeiro mes de novembro quedarán rematadas as obras de ampliación do aparcadoiro do Hospital Teresa Herrera da Coruña, no que a Xunta está a investir 336.000 euros.

A conselleira de Infraestruturas e Mobilidade supervisou hoxe as obras que se están a executar neste aparcadoiro co fin de favorecer a mobilidade en toda a contorna e facilitar o estacionamento das persoas que cada día se achegan para recibir asistencia sanitaria.

Estes traballos, que comezaron en xullo, teñen como obxectivo incrementar o espazo destinado a estacionamento e habilitar unha vía perimetral para favorecer a circulación en anel bordeando este aparcadoiro.

Segundo detallou a conselleira, actuouse sobre unha superficie de 1800 m², na parte traseira do Materno-Infantil, onde estaban os antigos depósitos e balsas de augas residuais.

Así, unha vez preparada a superficie, procedeuse a habilitar 2 zonas de aparcadoiro, creando 15 prazas nesa zona de balsas e de antigos depósitos, aproveitando e poñendo en valor a zona dunha infraestrutura que estaba en desuso; e 16 na explanada que xa se viña empregando como aparcadoiro.

Estas 31 prazas de aparcadoiro súmanse, segundo remarcou a conselleira, ás 53 xa habilitadas nunha actuación anterior, 84 prazas en total, entre as dúas actuacións levadas a cabo pola Xunta.

Tamén se está a executar un viario perimetral que permitirá a circulación en forma de anel, bordeando estes novos espazos e conectando co camiño de Xubias de Abaixo, ampliado na zona máis próxima á actuación.

Na parte máis próxima ao hospital, modificouse un dos actuais accesos, reformando a intersección e creando unha semiglorieta, co obxectivo de mellorar a ordenación do tráfico.

A conselleira precisou que as obras están moi avanzadas, coa superficie preparada para a pavimentación, executada a rede de pluviais e parte da iluminación.

Detallou que resta o pavimento de formigón sobre a superficie do aparcadoiro e sobre os viarios, a semiglorieta de entrada, sinalización e balizamento, que é no que se están a centrar as obras agora mesmo.

Indicou que a previsión é poder rematar os traballos de aglomerado a finais deste mes de outubro, quedando logo remates de pintura, sinalización e iluminación.

Investimentos da Xunta na cidade

Ethel Vázquez puxo en valor a aposta que a Xunta vén facendo pola cidade e a área da Coruña. Lembrou que este mesmo luns se presentou o proxecto da Torre Polivalente do Novo CHUAC, a 1ª peza do novo hospital público que se comezará a executar o vindeiro ano cos 28,5 M€ que están consignados nas contas autonómicas de 2023.

Lembrou que os Orzamentos da Xunta do vindeiro ano tamén reservan unha partida de 10 M€ para avanzar na execución da estación de autobuses intermodal, cuxas obras comezaron a finais de setembro. Nestas primeiras semanas estase traballando na implantación, con labores de roza e despexe e a localización de servizos afectados.

Referiuse tamén á partida en 2023 de 1,45 M€ para a estrutura flotante do Parrote, o primeiro proxecto autonómico que activa a recuperación da fachada marítima da cidade, para a que a Xunta ten comprometido un investimento de 20 M€.

No marco dos fondos de mobilidade sostible, apuntou que se avanzará na pasarela peonil de Santa Cristina, que suporá un investimento estimado de 8 M€. Instou, en todo caso, á alcaldesa e ao Concello da Coruña a que diga claramente se ten interese nesta infraestrutura, se está a favor ou non dunha pasarela peonil de Santa Cristina. Unha infraestrutura, dixo, que ten pleno sentido, que conta con todos os avais, desde o punto de vista da mobilidade e de protección do litoral, e que é un investimento de futuro, para impulsar a mobilidade sostible e facer cidade.