A Xunta acomete a limpeza da muralla de Lugo no marco das tarefas de mantemento, ás que destina case 616.000 euros
O delegado territorial, Javier Arias, explica que os traballos comezaron a principios de setembro, cando os informes de control de fauna constataron a marcha dos cirrios
2022-10-15
https://multimedia.xunta.gal/portal-web/Imaxes/Novas/2022/Outubro/semana-03/151022 limpeza Muralla.jpg
Lugo, 15 de outubro de 2022
A Xunta de Galicia está a realizar labores de limpeza da muralla de Lugo no marco do contrato de mantemento bianual, ao que destina 615.900 euros.
O delegado territorial de Lugo, Javier Arias, explicou que os traballos deron comezo a principios de setembro, unha vez que os informes de control de fauna constataron a marcha dos cirrios do monumento. A planificación da limpeza da muralla ao longo do ano respecta os períodos de nidificación e cría desta colonia de paxaros que forma parte da diversidade e a riqueza ambiental de Lugo.
As tarefas consisten no corte e retirada da vexetación con métodos manuais. Nas primeiras semanas limpouse o adarve, que xa está rematado, e avanzouse especialmente nos paramentos exteriores, se ben tamén están iniciados os traballos polo interior. En global, están executadas nun 50% aproximadamente e estímase que finalizarán na primeira quincena de novembro.
O contrato de mantemento inclúe outras actuacións cotiás no monumento, como reparacións de solados, varandas, revocaduras e albardillas, ou na instalación eléctrica e a iluminación, entre outros elementos.
Departamento:
C. de Presidencia, Xustiza e Deportes