O director da Axencia Galega da Calidade Alimentaria mantivo hoxe unha reunión con representantes do sector
A Xunta modifica a Mesa da Castaña para impulsar a produción amparada pola indicación xeográfica protexida Castaña de Galicia e as variedades autóctonas
José Luis Cabarcos tratou co presidente e co secretario do Consello Regulador da IXP, así como con integrantes da produción e da industria, as novidades en canto á composición do órgano que saen reflectidas na orde que publica hoxe o DOG
Tamén o Programa estratéxico do castiñeiro e da produción da castaña -que prevé recuperar deica o ano 2040 unhas 8.000 hectáreas de soutos e plantar outras 16.000 ha máis- e as novas axudas en tramitación para darlle un pulo ao sector
O director da Axencia Galega da Calidade Alimentaria, José Luis Cabarcos, informou hoxe ao sector dos cambios introducidos na Mesa da Castaña para fomentar o produto amparado pola indicación xeográfica protexida (IXP) Castaña de Galicia e as variedades autóctonas. Estes cambios -reflectidos na orde da Consellería do Medio Rural que publica hoxe o Diario Oficial de Galicia (DOG) para modificar a orde precedente pola que se creaba esa Mesa e se regulaba a súa organización, funcionamento e composición- derívanse do maior peso que se lle dará á Axencia Galega da Calidade Alimentaria neste órgano consultivo e asesor.
En concreto, no encontro de hoxe tratáronse as modificacións introducidas esencialmente en relación á composición da Mesa da Castaña. Todo co gallo de dirixir máis claramente a súa actuación aos aspectos relacionados coa produción e coa comercialización, co obxectivo de consolidar o sector como líder a nivel nacional.
Na xuntanza, o director da Axencia Galega da Calidade Alimentaria tamén presentou o Programa estratéxico do castiñeiro e da produción de castaña, enmarcado no Plan Forestal 2021-2040 e nas recomendacións da Comisión de Política Forestal do Parlamento galego, cun investimento previsto de case 22 millóns de euros ata o ano 2025. Cun total de 36 actuacións integradas en cinco eixes de intervención coas que se busca implicar a todos os elos da cadea de valor, José Luis Cabarcos recordou que o plan persegue recuperar unhas 8.000 hectáreas de soutos e plantar outras 16.000 hectáreas máis -para a produción de madeira e de froito- no horizonte do 2040, con vistas a acadar a máxima xeración de valor engadido vinculado ao cultivo do castiñeiro.
Canto ás novas axudas que está a tramitar a Consellería do Medio Rural, o director apuntou que incidirán no aumento de plantacións de castiñeiro para froito e na recuperación de soutos tradicionais.
Cómpre engadir que a superficie actual de castiñeiro en Galicia supera as 49.000 hectáreas, cunha produción media nos últimos anos próxima aos 20 millóns de quilogramos e un valor duns 20 millóns de euros pagados aos produtores e de 50 millóns en produtos transformados.
Enlace á orde no DOG:
https://www.xunta.gal/dog/Publicados/2022/20221013/AnuncioG0426-031022-0004_gl.html
Imaxes relacionadas
