A Xunta pon en valor a distinción do comedor do Centro de Formación e Experimentación Agraria de Sergude como 'Km 0 de Galicia' por usar produtos de proximidade nos seus menús

O director da Axencia Galega da Calidade Alimentaria, José Luis Cabarcos, vén de manter un encontro con alumnos do Centro de Formación e Experimentación Agraria (CFEA) de Sergude, en Boqueixón, no marco dunha xornada informativa sobre o que supón a distinción de “Km 0 de Galicia” que lle outorgou a empresa Slow Food Compostela.

O recoñecemento acredita que, ao igual que nos centros de Lourizán, Becerreá e do Pedro Murias, o comedor do CFEA de Sergude está a empregar este curso producións de tempada e de proximidade nos seus menús, destacando o uso de produtos amparados por distintos selos de calidade diferenciada. Desta forma, preto do 60% dos alimentos escollidos proveñen de canles curtas de comercialización, ao ser de produtores da propia comarca.

Así, segundo destacou José Luis Cabarcos, estase a apostar pola valorización da produción alimentaria galega e por implementar a súa filosofía de desenvolvemento sustentable. Ademais, búscase acadar un impacto no territorio económico, social, ambiental e educativo, sen perder de vista a propia viabilidade económica da iniciativa.

Para acadar a distinción “Km 0 de Galicia”, levouse a cabo co persoal dos comedores unha formación específica sobre a xestión de residuos, a eficiencia enerxética e o abastecemento, facendo fincapé na correcta identificación dos alimentos certificados, ben sexan de pesca sostible, de razas autóctonas ou alimentos con certificados de calidade. Seguidamente, buscáronse provedores da contorna que puidesen facilitar produtos adecuados ás necesidades de cada un dos comedores e garantir o abastecemento dos alimentos durante toda a tempada.