A Xunta pon en marcha o novo programa de estadías lingüísticas ‘Spring Week’ con 1.575 prazas
O obxectivo é estimular a práctica oral do alumnado de 6º de Primaria a 4º de ESO en lingua inglesa, co apoio de profesorado nativo, e fomentar a convivencia
O programa desenvolverase na primavera, do 16 de abril ao 17 de xuño nun centro residencial en Galicia, en réxime de internado de domingo a sábado
Os centros poderá solicitar participar na iniciativa ata o 17 de outubro
Trátase dunha das accións previstas na Estratexia Galega de Linguas Estranxeiras 2030
A Xunta de Galicia convocou o novo programa de estadías lingüísticas Spring Week, que se desenvolverá entre o 16 de abril e o 17 de xuño de 2023. A iniciativa vai dirixida a centros docentes públicos, nos que se impartan ensinanzas de 6º curso de Educación Primaria ou de ESO e poderán participar un total de 1.575 alumnos.
O programa desenvolverase nun centro residencial situado en Galicia en réxime de internado e ten como obxectivo a estimulación da práctica oral da lingua inglesa e a su´a utilización en contextos comunicativos máis amplos que os que permite a contorna escolar.
Durante a estadía, que se realizará en quendas semanais de domingo pola tarde ata o sábado seguinte pola mañá, o alumnado contará co apoio de profesorado nativo en lingua inglesa. As actividades fomentarán a convivencia e xirarán arredor de temáticas de interese cultural, social, artístico e medioambiental.
A metodoloxía será activa, lúdica e cooperativa e promoverá aprendizaxes significativas por parte do alumnado, incidindo na educación en valores democráticos e nos aspectos relacionados coa sostibilidade e o coñecemento da contorna (enerxías renovables, produción e consumo responsable, cidades sostibles, acción polo clima...), segundo se recolle nos obxectivos de desenvolvemento sostible da Axenda 2030.
O prazo de presentación de solicitudes remata o 17 de outubro, incluído. Os centros interesados poderán realizar os trámites a través da aplicación informática habilitada para tal fin. A distribución de prazas por quendas é a que se relaciona no seguinte cadro:
QUENDA | DATAS | CURSO | ALUMNADO |
1ª quenda | do 16 ao 22 de abril | 4º de ESO | 175 |
2ª quenda | do 23 ao 29 de abril | 3º de ESO | 175 |
3ª quenda | do 30 de abril ao 6 de maio | 3º de ESO | 175 |
4ª quenda | do 7 ao 13 de maio | 2º de ESO | 175 |
5ª quenda | do 14 ao 20 de maio | 2º de ESO | 175 |
6ª quenda | do 21 ao 27 de maio | 1º de ESO | 175 |
7ª quenda | do 28 de maio ao 3 de xuño | 1º de ESO | 175 |
8ª quenda | do 4 ao 10 de xuño | 6º EP | 175 |
9ª quenda | do 11 ao 17 de xuño | 6º EP | 175 |
TOTAL | 1.575 | ||
Este novo programa enmárcase na Estratexia Galega de Linguas Estranxeiras 2030. Dotada con 83M€ ata 2025, esta liña de acción prioritaria da Consellería de Cultura, Educación, FP e Universidades busca consolidar os programas de éxito desenvolvidos na última década e incorpora novas accións para maior especialización en idiomas
Imaxes relacionadas
