Luis López destaca a colaboración entre a Xunta e a Universidade de Vigo para impulsar o crecemento e prestixio do campus de Pontevedra

O delegado territorial da Xunta en Pontevedra, Luis López, destacou a “forte colaboración” entre o Goberno galego e a Universidade de Vigo para impulsar cada ano o crecemento e o prestixio do Campus Crea de Pontevedra. Neste senso, salientou a importancia deste traballo conxunto e garantíu que a Xunta “vai estar sempre apoiando a este espazo académico para que siga avanzando e mellorando”.

O representante autonómico realizou esta mañá unha visita institucional, que comezou pola Escola de Enxeñería Forestal, a gran parte das facultades e demais instalacións universitarias do centro de estudos da Xunqueira na compaña da vicerreitora, Eva Lantarón, co gallo do inicio do curso académico 2022/2023.

“O desenvolvemento deste Campus de Pontevedra foi espectacular nos seus pouco máis de trinta anos de historia e, dende a Xunta, imos seguir apoiándoo e traballando en común, xa que temos o pleno convencemento de que, se a universidade avanza, toda Galicia avanza con ela”, explicou o delegado territorial, que subliñou que as institucións galegas van subindo, ano a ano, nos ránkings e informes das principais universidades do mundo.

Luis López concretou que o Campus de Pontevedra conta con cinco facultades e dous centros adscritos, un deles no Concello de Marín, “cunha gran calidade e implicación no profesorado e un elevado grao de especialización en cienciais sociais, da saúde, enxeñería, artes e deportes”.

Nesta liña, indicou que a oferta pontevedresa, pertencente á Universidade de Vigo, alcanza este curso os doce graos, outros tantos másteres e cinco programas de doutorado, xa que se impulsou a incorporación dunha nova ensinanza de Mestrado en Exercicio Terapéutico e Funcional, dotada con vinte prazas e que se imparte na Facultade de Fisioterapia.

“A evolución do Campus de Pontevedra, pequeno polo momento pero moi moderno, permitiu poñer en valor un barrio periférico da cidade como o da Xunqueira, co cal tamén ten un compoñente urbanístico sostible moi importante, e esta aposta polas súas infraestruturas vai continuar nunha contorna privilexiada co apoio da Xunta e tamén noutros espazos, xa que está moi preto a cesión dun importante local no edificio administrativo de Benito Corbal”, concretou o delegado territorial.

Tamén indicou que o aumento da oferta, a mellora das instalacións e o incremento do seu prestixio “motiva que moitísimos estudantes de toda Galicia e de fóra da nosa comunidade teñan na súa mente a Pontevedra como posible lugar de estudos, o que xera unha importante sinerxia socioeconómica no municipio ao recibir a milleiros de persoas cada ano”.

Finalmente, Luis López salientou que o compromiso da Xunta coas universidades galegas plásmase tamén no plan económico acordado a finais do pasado ano e que suporá un financiamento de 3.200 millóns de euros no lustro 2022-2026, o que supuxo un incremento do 30% con respecto ao período anterior.