O director xeral de Maiores e Atención Sociosanitaria, Antón Acevedo, acompañado do delegado territorial da Xunta en Lugo, Javier Arias, visitou hoxe este servizo
A Xunta visita a unidade de Coidados porta a porta ao seu paso polo concello de Quiroga
Máis de 20.000 persoas de toda Galicia xa recibiron atención gratuíta en podoloxía, audioloxía e estimulación da memoria a través desta iniciativa desde o mes de marzo
Na provincia de Lugo esta iniciativa leva atendidas a 4600 persoas
O obxectivo é que as persoas maiores teñan ao carón dos seus fogares os servizos que necesitan para que poidan seguir vivindo alí onde prefiran
Outras medidas dirixidas aos veciños de máis idade que residen no rural son o reforzo de programas como o Servizo de Axuda no Fogar (SAF) ou o Xantar na casa, así como a ampliación da rede de Casas do maior
O director xeral de Maiores e Atención Sociosanitaria, Antón Acevedo, visitou esta mañá a unidade móbil do programa Coidados porta a porta situada no concello de Quiroga. Este servizo achega aos maiores de 55 anos atención gratuíta en podoloxía, audioloxía e estimulación da memoria e desde a súa posta en marcha no mes de marzo leva atendidas a máis de 20.000 persoas.
Durante a súa visita, o director xeral estivo acompañado do delegado territorial da Xunta en Lugo, Javier Arias, e do alcalde desta localidade, Julio Álvarez. A provincia de Lugo é a terceira que máis persoas leva atendidas neste tempo: máis de 4600. A da Coruña é a que rexistra ata o momento un maior número de beneficiarios con máis de 5600; a esta síguelle a de Pontevedra con preto de 5000. En último lugar, atópase a provincia de Ourense con case 4200 usuarios.
Por medio de oito autobuses que percorrerán todos os concellos galegos agás as sete cidades, a Consellería de Política Social e Xuventude facilita coidados médicos e de saúde en xeral preto dos fogares das persoas maiores, evitándolles desprazamentos fóra da súa contorna e posibilitando que poidan seguir vivindo alí onde prefiran.
Para ser atendido en calquera dos autobuses de Coidados porta a porta, que continuarán percorrendo o territorio galego, cómpre solicitar cita previa nos números de teléfono 622 748 283 ou 623 546 992, ou ben a través do seguinte enderezo electrónico: coidadosportaaporta.politicasocial@xunta.gal
Atención no rural
Este programa enmárcase na aposta do Executivo autonómico por poñer a disposición dos veciños de máis idade que viven no rural todas as atencións que poidan necesitar. A este obxectivo responde o reforzo do Servizo de Axuda no Fogar (SAF), que garante uns coidados profesionais a uns 25.000 galegos nos seus propios domicilios; o impulso de Xantar na casa, que leva a comida a 1.800 fogares; ou as axudas para crear máis dun centenar de Casas do maior, pequenos centros para favorecer o envellecemento activo e saudable nos concellos de menos poboación.
Imaxes relacionadas
