A Xunta inicia o traslado dos arquivos xudiciais á Cidade da Xustiza

  A Xunta iniciou hoxe o traslado do arquivo xudicial dos xulgados da rúa Lalín á Cidade da Xustiza no marco do plan de traslado acordado cos sectores implicados.

Unha vez finalizados estes traballos, a mediados do próximo mes prevese continuar co resto das 39 unidades xudiciais, cunha media de dous órganos por semana. Tamén se trasladarán a Fiscalía de Área, as dúas seccións da Audiencia Provincial, a subdirección do Instituto de Medicina Legal (Imelga), e o resto dos servizos comúns, como o decanato ou o servizo de atención ao cidadán, entre outros.

En total, o novo edificio xudicial acollerá máis de 500 traballadores, que terán á súa disposición unha escola infantil de 41 prazas para facilitarlles a conciliación laboral e familiar.

Cómpre lembrar que coa licenza de primeira ocupación, a Xunta xa levou a cabo os trámites previos ao traslado definitivo, traballando na recepción do mobiliario, na organización de espazos e na instalación dos equipos de gravación das salas de vistas.

A Cidade da Xustiza de Vigo é a obra xudicial máis importante desde que a comunidade ostenta as competencias en materia de Administración de Xustiza e a mellor do noroeste peninsular. Trátase dunha infraestrutura moderna, funcional e segura que contou cun investimento do Goberno galego de máis de 42 millóns de euros no marco do Plan de Infraestruturas Xudiciais, cun investimento de 125 millóns de euros e que permitiu dotar de novas sedes as cidades galegas e mellorar as xa existentes.

Cómpre engadir que o actual edificio dos xulgados situado na rúa Lalín de Vigo, unha vez rematado esta traslado das unidades xudiciais á Cidade da Xustiza, porase á disposición de entidades sociais da cidade para a ocupación temporal para usos sociais, culturais ou sanitarios dos locais. Por iso, a Xunta desenvolverá un concurso de ideas mediante un convenio de colaboración co Colexio Oficial de Arquitectos de Galicia (COAG) para levar a cabo as obras de rehabilitación coas que habilitar locais que poderán ser ocupados por entidades sociais.

Coa posta á disposición do edificio da Rúa Lalín a entidades sociais da cidade, a Xunta contribúe a mellorar a calidade de vida local e fomentar e dinamizar o asociacionismo.