A Xunta cede ao concello de Lugo unha área no contorno do edificio administrativo para facilitar a urbanización da zona
Paralelamente, o Goberno galego solicita a concesión de dominio público sobre unha parte para seguir utilizando e asumindo o mantemento da explanada pavimentada
A Xunta de Galicia formalizou a cesión ao Concello de Lugo dunha superficie de 1727 metros cadrados no contorno do Edificio Administrativo, que comprenden a explanada fronte á fachada principal e o xardín lateral.
O delegado territorial da Xunta, Javier Arias, e a alcaldesa de Lugo, Lara Méndez, asinaron hoxe a correspondente escritura pola que se cede e transmite este predio co obxectivo de facilitar a urbanización da zona.
Paralelamente, a Xunta xa solicitou ao Concello que, unha vez realizado este trámite, outorgue unha concesión de dominio público sobre 896 metros cadrados que corresponden ao solo pavimentado. Deste xeito, a Delegación Territorial seguiría facendo uso e asumindo o mantemento da explanada, onde se atopa a entrada principal da súa sede.