A Xunta aposta por ofrecer ás persoas maiores a oportunidade de compartir todo o seu coñecemento e experiencia

O director xeral de Maiores e Atención Sociosanitaria, Antón Acevedo, participou esta mañá na xornada ‘Generación Senior, soluciones para un futuro pleno’, organizada por Faro de Vigo e Mapfre. Durante a súa intervención, sinalou que o Goberno galego aposta por ofrecer ás persoas maiores a oportunidade de compartir todo o seu coñecemento e experiencia.

O director xeral destacou a necesidade de que os poderes públicos promovan unha vida activa e saudable das persoas maiores. Neste sentido, apuntou que a Xunta seguirá reforzando os programas universidade sénior, que permiten que as persoas maiores retomen ou inicien cursos universitarios, ou os programas de voluntariado sénior, para seguir aportando a súa experiencia e que deste xeito lle sexa útil a toda a sociedade. 

O Goberno autonómico traballa tamén na posta en marcha dun novo programa de viaxes, talasos e balnearios que lle permitan ás persoas maiores desfrutar desta etapa vital e vivir novas experiencias. En definitiva, Antón Acevedo reivindicou a necesidade de poñer en marcha iniciativas que permitan manter un ritmo de vida activo, aprender novas disciplinas e ter novas oportunidades.

Ademais, a Xunta presentará nos próximos meses a Estratexia Galega de Atención á Soidade non Desexada coa que se buscará previr, detectar, intervir, visibilizar e buscar vías de cooperación para atender ás persoas en situación de soidade non desexada. Galicia converterase así na primeira comunidade en contar cun documento destas característica.

Atención a maiores

O director xeral lembrou que o Goberno galego conta cunha ampla rede de programas e servizos para, de ser necesario, as persoas maiores conten coa atención necesaria e poidan seguir vivindo onde prefiran. Neste sentido, enumerou os programas como as casas do maior, o programa Xantar na casa ou o Servizo de Axuda no Fogar, que permiten que reciban coidados e atencións nos seus propios domicilios.