A Xunta e a Comunidade de Montes de Vigo poñen en marcha o II Obradoiro Forestal con 10 alumnos

Vigo, 21 de setembro de 2022 A delegada territorial da Xunta en Vigo, Marta Fernández-Tapias, visitou hoxe ao alumnado que vén de iniciar a súa formación no II Obradoiro Forestal organizado pola Mancomunidade de Montes de Vigo co financiamento da Xunta.

Segundo indicou, na segunda convocatoria deste obradoiro fórmanse 10 desempregados e desempregadas en tarefas de roza, repoboacións e infraestruturas forestais, recolección de froitos e sementes, tratamentos silvícolas e control de pragas e enfermidades. A achega da Xunta é de 251.993,50 euros e as actividades realízanse nos montes de Beade, Bembrive, Comesaña, Coruxo, Matamá, Saiáns e Valadares.

Fernández-Tapias incidiu en que este ano o Executivo autonómico destina 5 millóns de euros a once talleres duais de emprego en 9 concellos na área de Vigo. Neste sentido, detallou que a nova convocatoria deste programa mixto de formación e emprego, a dirixida á realización de obradoiros duais tamén para maiores de 30 anos, permitirá no caso da área viguesa que 206 persoas sen emprego melloren a súa cualificación ao tempo que acceden a un traballo. Unha iniciativa da que Fernández-Tapias destacou que incrementa nun 40%, ata os 504.000 euros por taller, o orzamento do pasado ano e o tempo de duración, de 9 a 12 meses.

Tras destacar o compromiso do Goberno galego por incrementar as oportunidades e a estabilidade laboral dos galegos e galegas, cunha formación adaptada ás demandas reais do mercado e en colaboración cos concellos, a representante autonómica subliñou que as actuacións propostas contribúen a mellorar os espazos públicos e a ofrecer servizos de interese xeral e social, incrementando o emprego nos concellos.

Estes obradoiros ofrecen formación e emprego a 20 persoas, que contarán cun contrato de traballo durante a súa participación na actividade e, ao finalizar a etapa formativa, acreditarán as ensinanzas recibidas cun certificado de profesionalidade.

Fernández-Tapias referendou así o compromiso do Executivo galego por incrementar as oportunidades e a estabilidade laboral dos galegos e galegas, cunha formación adaptada ás demandas reais do mercado e en colaboración cos concellos.

A este organizado pola Mancomunidade de Montes de Vigo súmase o que Gondomar promoverá xunto a Baiona e Nigrán, a iniciativa Coidando Miñor II; o Rehabilita Salceda enSalceda de Caselas; Salvaterra Emprega II en Salvaterra de Miño; o Granxa da Rúa XI que porá en marchaCangas ; o Labora VI impulsado por Moaña; a terceira edición do Redondela Máis que Bela; Porremprego Cualifica no Porriño; o Vigo Capacita VIII do Concello de Vigo; o taller Queda en Mos; e o organizado pola Mancomunidade da Área Intermunicipal de Vigo, o Maiv Dual 2022

Ademais, Fernández-Tapias engadiu que catro dos once obradoiros ofrecen incentivos á contratación en empresas da zona, por un mínimo de 3 meses, o que axudará á inserción laboral de 59 persoas na comarca viguesa tras finalizar a súa etapa formativa. É o caso do Moaña Labora VI, Granxa da Rúa XI, Queda en Mos e o Vigo Capacita VIII.