O programa ‘Coidados porta a porta’ da Xunta atendeu a máis de 4.200 lucenses desde marzo e segue percorrendo a provincia

As unidades móbiles doprograma Coidados porta a porta da Xunta levan atendidos a máis de 4.200 usuarios da provincia de Lugo desde a súa posta en marcha o pasado mes de marzo.

Así o explicou hoxe o delegado territorial da Administración autonómica, Javier Arias, que visitou un dos autobuses na súa parada en Monforte de Lemos, onde permanece desde o pasado venres ata mañá na explanada da Compañía.

Esta iniciativa da Consellería de Política Social e Xuventude ofrece atención gratuíta de podoloxía, audioloxía e estimulación da memoria a persoas maiores de 55 anos. “O obxectivo é chegar a todos os concellos agás as sete grandes cidades galegas para que as persoas que precisen estes coidados poidan acceder a eles sen ter que desprazarse”, dixo Arias.

As unidades móbiles continuarán percorrendo a Zona Sur da provincia de Lugo ata finais de setembro. Así, estes días están en Monforte de Lemos -onde seguirán hoxe e mañá – e Ribas e Sil -que acolle o autobús ata o xoves 22-. Tamén prestarán servizo en Bóveda -os días 22, 23 e 26 -; Quiroga -o 23, 26, 27 e 28 – e A Pobra do Brollón (29 e 30). Ademais, do 27 ao 30 irán a Sarria.

As persoas interesadas en solicitar cita previa para ser atendidas poden facelo a través dos teléfonos 622 748 283 e 623 546 992; así como no correo electrónico coidadosportaaporta.politicasocial@xunta.gal.